Haizea, lagun edo etsai

Kontxako Banderak sei mugarri izaten ditu: osteguneko sailkapena da aurrenekoa; egun berean egiten den txanda zozketa da bigarrengoa; gaurko kale zozketa da hirugarrengoa; estropada laugarrena; bosgarrena hurrengo igandeko kale zozketa izaten da; eta seigarrena, bigarren jardunaldiko estropada. Aurrenekoa gainditu zuten zazpi traineruak eta Donostiarra bigarren mugarria gaur erabakigarria izango ez ote den ari dira galdezka, hirugarren eta laugarren mugarriak heldu artean.

Izan ere, ostegunean, txanda zozketako bolak jostariak atera ziren, lau faboritoak bi txandetan banatu zituztelako, binaka. Aurrenekoan doaz gaur Urdaibai eta Kaiku, eta bigarrengoan Hondarribia eta Orio. Donostiako eremuan, ia urtero gauza bera egiten du eguraldiak: txandatik txandarako tartean haizea ekartzen du, eta horrek, jakina, mesede egiten die lehen txandakoei eta kalte bigarrengokoei. Kezkaz beteta zeuden ostegunean, zozketa bukatu berritan, Orioko ordezkariak, esaterako. Haizea, ditxosozko haizea buruan bueltaka. Kezkatiak ez lasaitzeko, atzoko hau dago: Asier Zurinaga Kaikuko patroiaren hitzak dira, goizeko entrenamendua bukatu eta Lasarteko hotel batean zegoela, bazkaltzeko zain: «Uretan ginen atzo eguerdian, entrenatzen, Donostian, eta 12:20an puntu-puntuan hasi zen haizea ekartzen, indarra hartzen hasi zen».

Ederki azaldu zuen zer nahi duen gaurko: «Kanporanzko luzean haizerik ez izatea nahi dut, baldin badago kontra izango dugulako. Eta atera behar badu, atera dadila bigarren luzea egiten ari garen bitartean, alde izango genuke eta. Gero, jarrai dezala horrela, bigarren txandakoek kontran izan dezaten kanporanzko luzean». Bat egingo dute ziurrenik nahi horiekin Urdaibaikoek ere. Lau faboritoen artean indartsuenak izateko ez zaie asko faltako, eta gainera, haizea lagun izaten badute, kontuz haiekin gaur.

Itsaso ona dago emanda. «Giro horrekin ez dut uste kaleen arteko aldeak erabakigarriak izango direnik», esan zuen atzo Jose Luis Kortak. Kasu eginez gero Kaikuko entrenatzaileari, hirugarren mugarria, gaurko kale zozketarena ez da izango erabakigarria.

Hala ere, aukeratzeko aukera emanez gero taldeei, lehendabiziko kalea ez du inork nahi izaten, eta zerbaitegatik izango da. Hortik joanda irabazi izan da banderarik behin baino gehiagotan, baina ez da gustuko kalea. Erdikoak hobe, eta erdikoetan hirugarrenak izaten du maitale gehien.

Lehenengo txandako lehia aztertzen hasita, faboritoa bat eta bakarra da: Urdaibai. Kaiku parean jarri zaio azken hilabetean, baina hala ere, nekez gerturatuko zaio Bermeo taldeari, honek egunik onena izaten badu. Joan zen urteko arantza ere hor dute Bermeokoek, bandera epaileen erabakiz galdu zutelako, eta hori ondo bideratzen asmatzen badute, handiren bat egiteko moduan da Jon Salsamendik entrenatutako taldea.

Portugalete eta Cabo izango dituzte alboan Urdaibaik eta Kaikuk. Bien arteko lehia beste bien artekotik apartekoa izango dela ematen du, udako emaitzak kontuan hartzen badira behintzat. Eta Cabok aukera gehiago dauzka txandan azkena ez bukatzeko. Bi hauek ere haizeari begira egongo dira. Txandan aurrean ez ibili izanagatik ere, haizeak laguntzen badie sar daitezke bigarren igandeko ohorezko txandan.

Hondarribia eta Orio, estu

Haizeak zer egingo duen edo zer egiten ari den seinaleak emanda izango ditu bigarren txanda hasterako; edo hor nonbait ibiliko da. Hondarribia eta Orio joango dira alde batetik, uda osoko buruz buruko lehiari beste atal bat gehituz. Bietako batek behar luke txandako garaile. San Juanen helburua goiko bi horiek gertu edukitzea izango da. Lan ona eginez gero, zergatik ez du lortuko? Eta Donostiarrarena jakina da zein den. Lan duina egitea dute asmotzat. Hauei eragiten die gutxien haizearen gorabeherak. Astinduko ote du trapua gaur bertan batera edo bestera balizko eguerdiko haize aldaketa horrek? Eta ez bada haizea aldatzen?