Albistea entzun

Pilota. Binakako finala

Buru berriak estaliko ditu txapelak

Lau hilabeteren ondoren, binakakoan gaur jakingo da nor diren txapeldunak: Irribarria eta Rezusta edo Bengoetxea VI.a eta Larunbe
JUAN CARLOS RUIZ / ARGAZKI PRESS Tamaina handiagoan ikusi

Jon Eskudero -

2017ko apirilak 9

Pilotak urtean duen egunik handiena buruz buruko finala omen da. Tradizioak hala erakutsi izan du, behintzat. Halere, estatistikek diote binakako txapelketak erakarri ohi duela jendea gehien. Iazko abenduan hasi eta lau hilabetez, leporaino beteta egon dira hainbat pilotalekutako harmailak, eta finalak ere sortu du ikusmina. Ez da gutxiagorako, bi bikoterik onenak lehiatuko baitira gaur, Bilbon, Bizkaia pilotalekuan (17:00, ETB1). Iker Irribarria eta Beñat Rezusta izango dira faboritoak, nagusitasun handia erakutsi baitute txapelketan. Hamazazpi partida jokatu, eta hamabost irabazi dituzte. Hori bai, Oinatz Bengoetxeak eta Mikel Larunbek badute baikor izateko motiborik, behetik gora eginda baitaude. Gainera, Aspekoek galdutako bi neurketak haien kontra galdu dituzte. Edonork irabazten duela ere, buru berriak estaliko ditu binakako txapelak.

Belaunaldi aldaketaren kontua ez da berria. Iazko finala gogoan, betealdirik hartu gabe geratu behar izan zuten pilotazaleek. Besteak beste, Juan Martinez de Irujok min hartu eta, ia jokatu gabe, txapeldun izan baitziren Aimar Olaizola eta Mikel Urrutikoetxea. Hots, urtebete bada Irujo kantxetatik kanpo dagoela, eta ez dirudi itzultzeko aukera handirik duenik ere, bihotzeko arazoak direla medio. Haren hutsunea nabarmena izan arren, gazteek erakutsi dute sasoiz gainezka daudela, eta gaur oso gazteak izango dira lau pilotarietatik hiru: adinkideak dira Rezusta eta Larunbe, 1993koak, eta hiru urte gazteagoa Irribarria. Hiruretako inork ez du sekula jantzi binakako txapela. Bengoetxea VI.ak behin irabazi du, 2015ean.

Ikusmina, pilotekin

Esperientzia ez ezik, aurrekariak ere alde ditu Asegarceko bikoteak. Final-laurdenetako ligaxkan, bitik bi partida irabazi zizkien Irribarria-Rezustari. Lehenbizikoan, Hendaian (Lapurdi), aise nagusitu ziren: 22-16. Hori bai, Hendaiara zihoala auto istripua izan zuen Rezustak, eta ez zuen izan baldintza onenetan jokatzerik. Bigarrenez, Tolosan (Gipuzkoa) lehiatu ziren, eta tanto bakar batez irabazi zuten Asegarcekoek: 22-21. Bi partida horietan, jokoan askoz gutxiago izan zuten Aspekoek, ezin hobeto bideratua baitzuten finalerdietarako sailkapena. Horregatik, finalerdietan sartu eta euren onena eman behar zuten garaian, arazorik gabe gainditu zituzten Bengoetxea VI.a-Larunbe, Donostian: 22-14.

Emaitzaren gainetik, lau pilotarien jokoarekin geratu ziren aho zabalik hainbat pilotazale. Frontoi batean gutxitan ikusi izan den abiaduraz mugitu zuten pilota, eta gipuzkoarren joari aurre egin ezinda geratu ziren Asegarcekoak partidaren bigarren zatian. Hortaz, baliteke finalak ere ildo beretik jotzea. Irribarriak eta Rezustak agindu egingo dute aurretik, eta ikusi beharko da Larunberen maila. Profesionaletako lehen finala izango du, eta nerbioak kudeatzen asmatu beharko du. Lan ona eginez gero, Bengoetxea VI.ak aukera gehiago izan dezake jokoa nahasteko. Pilotek sortu dute polemika, eta ikusi beharko da nolako jarrera hartuko duten. Aspekoek pilota bizien alde egingo dute, eta alderantziz Asegarcekoek.

Pilotalekuak izango du azken hitza, eta harmailetan ere giro beroa espero da. Sarrera gehienak salduta daude. Irribarria eta Rezusta nagusitzen badira, Gipuzkoara itzuliko dira txapelak, hemeretzi urteren ostean. Unanue-Errastik 1998an irabazi zuten, Gipuzkoako beste bikote baten aurka (Etxaniz-Elkoro), 22-21.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Kike Barja, gaur, jokaldi batean. ©Biel Aliño / EFE

Osasunak hutsean berdindu du Levanteren zelaian

Berria

Gorritxoek zazpi jardunaldi daramatzate irabazi gabe, baina zortzigarren postuari eusten diote. Gaur hobea izan da Levante, sailkapeneko azkena.

Urrutikoetxea eta Aranguren besarkatuta, gaur, Bilbon, Albisuri eta Peñari irabazi berritan. ©Marisol Ramirez / Foku

Bigarren garaipena Urrutikoetxea-Arangurenentzat

Berria

Ezustekoa eman eta bikote faboritoetako bati irabazi diote. Urrutikoetxea izan da partidako onena. Emakume Master Cupeko lau eta erdiko finala Miriam Arrillagak eta Amaia Aldaik jokatuko dute.

Alaveseko eta Valentziako jokalariak lehian, gaur. ©Jaizki Fontaneda / Foku

Alavesek eta Realak irabazi, Eibarrek berdindu

Paulo Ostolaza

Emaitza bikainak eskuratu dituzte gaur jokatu duten hiru euskal taldeek. Alavesek Valentziari irabazi dio (3-1), Realak Madrili (1-2), eta Eibarrek Huelvan berdindu du (1-1).

Realeko jokalariak burumakur, Real Madrilek bigarren gola sartu eta gero. ©JAVIER ETXEZARRETA / EFE

Biguntasuna ordaindu du

Ainara Arratibel Gascon

Lehen zati amaiera on baten ostean, Realak bi gol jaso ditu bigarren zatiaren hasieran, atzean gaizki zaindutako bi jokalditan. Ezin izan du suspertu. Txuri-urdinek hirugarren porrota kateatu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Jon Eskudero

Informazio osagarria