Albistea entzun

ARKUPEAN

Ezkerraren krisia

Jule Goikoetxea -

2015eko abenduak 16

Frantziar nazioak bere subiranotasuna galdu du, eta hiritarren botere publikoa esku goseti gutxitan gelditu da pribatizazioak direla eta. Europar Batasunean hiritar frantsesek ez dute ezer negoziatzeko gaitasunik, eta nazioartean zuten prestigio eta eragina zeharo murriztu da. Hiritar frantsesek lan duinak edukitzeko eskubidea dute eta errefuxiatu uholdea estatu frantziarrak eta, oro har, Europak, eragin dute. Hau da Mariane Le Pen eskuin muturreko Fronte Nazionaleko alderdi-buruaren diskurtsoa, Europar Legebiltzarrean, François Hollande lotsatu eta mututuaren aurrean eta komunean ezkutatutako europar ezkertiarren izenean. Demokrazia boterean birbanaketan oinarritzen da, esan zuen Le Penek. Badakigu europar ezkerrak lau belaunaldi daramatzala azken honek esaten, baina estatua biolentzia makineria gaitzesgarria dela zioen jarraian eta gero nazioak desegin behar direla eta demokrazia hiritartasunean oinarritu klaserik, naziorik eta estaturik gabeko gizartea lortu nahi bagenuen. Berdin marxistak, sozialistak, anarkistak edo komunistak (90eko hamarkadan desagertuak), kontuan izanik sozialistek eta Gaullistek aspaldi egin zutela neoliberalismoaren alde. Unibertsitarioek ezkerraren multikulturalismoa bozkatzen duten bitartean, langileriak Fronte Nazionalaren laïcité-a (katolikoa, baina laïcité-a) bozkatzen dute. Fronte Nazionala langileria pobreenaren (%28), nekazarien (%37), autonomoen, langabetuen eta gazteen artean bozkatuena da, hezkuntza eta diru sarrera maila baxuena dutenen artean nagusia. Unibertsitarioek bakarrik uler dezaketelako nola birbanatu boterea estaturik, subiranotasunik eta naziorik gabe (ironia on).

Kurioski, estatuari eta subiranotasunari dagokienez, Le Penen diskurtsoa akademian egiten diren analisiekin bat dator: herriak ez du jada burujabetasunik, eta estatu subiranotasuna berreskuratu ezean arnasa pribatizatuko digute. Ezkerreko akademiak hori dio, Europa osoan, baina ezkerreko alderdiak ez dira hori esateko gai (independentzia prozesu batean murgildurik ez daudenak).

Alemaniako, Ingalaterrako, Frantziako, Italiako, Espainiako… ezkerreko alderdiak (sozio-liberalak ez dira kategoria honetan sartzen) ez dira diskurtsiboki herri subiranotasuna Le Penen indarrarekin defendatzeko gai, herri subiranotasunaren defentsak mugen defentsa dakarrelako eta ezkerrari mugak ez zaizkio gustatzen (neoliberalei bezalaxe), horregatik nahi dute estatuaren desagerpena, batetik, mugak desagerrarazteko, bigarrenik, estatuak sortzen dituelako haien iritziz klase ekonomikoen arteko ezberdintasunak. Ezkerrak ezin dituenez mugak defendatu, ezin du herri subiranotasuna nazioarekin lotu nazioaren defentsa mugen arabera egiten delako (nazioa nazio izateko mugak behar dituelako) eta, bestetik, balio marxista internazionalistekin osagarria ez delako (hori izan da azken mendeko diskurtsoa independentzia prozesu batean ez dauden ezkerreko alderdien eta herrien kasuan).

Europar ezkerrak ezin du herri subiranotasuna defendatu Le Penen indar berdinarekin estatu-nazioak gaitzetsi dituztelako haien diskurtsoan azken bost belaunaldietan (gutxienez), kontuan izan gabe orain arte birbanatu den botere eskasa beren nazio-estatuak birbanatu duela. Nola defendatu zure demokrazia, demokrazia osatzen duten elementu funtsezkoenak errefusatuz?, galdetzen du Le Penek. Nola esango dio ezkerrak jendeari Europar Batasuna lobby finantzario bat dela, eta Europar Legebiltzarra balio ez duten politikarientzako Lanbide II bat dela, lau belaunaldi batasunaren bake ustela eta demokrazia oligarkikoa defendatzen egon eta gero? Demokrazia egon dadin, zioen europar ezkerrak, estatuek eta nazioek indarra galdu behar dute, bestela nazio bakoitzak bere interesak defendatuko ditu eta ezingo da batasunik lortu. Baina, nola ez du ba herri batek bere herria defendatuko? Hori izan da ezkerraren obsesioa azken hamarkadetan (frantziar ezkerra izanik Europako estatistena eta ia nazionalistena, atera kontuak): estatua deabrutu dute, ez zuten naziorik, ez mugarik, ez estatu subiranotasunik nahi. Klaserik gabeko gizarte globala nahi zuten.

Jan dezala orain frantziar, britainiar, italiar eta espainiar ezkerrak subiranotasunik, estaturik eta naziorik gabeko txatxi-piruleta global eta unibertsitario hau. Guk ez baitugu egingo.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley
Ondoeza

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...