Albistea entzun

Bere buruari botoa

EAEko Ahal Dugu-k Batzar Nagusietan bere hautagaia bozkatzeko asmoa du gaur-gaurkoz.

Uriartek baztertuak ditu gobernu itunak
Arabako Podemos Ahal Duguko kideak, agerraldi batean.
Arabako Podemos Ahal Duguko kideak, agerraldi batean. BERRIA

Enekoitz Esnaola -

2015eko martxoak 17

EAEko Podemos Ahal Dugu eratu berria da; «egonkortu» beharra dauka; «azkarregi» datozkio foru hauteskundeak, eta bozen ostean ez du «arriskatuko» inbestidura saioetan eta gobernu itunei buruzko elkarrizketetan. Horrela dio Roberto Uriarte Araba, Bizkai eta Gipuzkoako Ahal Dugu-ko idazkari nagusiak. «Ondorioz, inbestidura saioetan geure hautagaien aldeko botoa emango dugu. Geure burua bozkatuko dugu», esan dio BERRIAri.

Maiatzaren 24an, EAEko Ahal Dugu bere markarekin Batzar Nagusietara baizik ez da aurkeztuko, eta, inkestek diotenez, inbestiduran oso garrantzitsua izan daiteke bere batzarkideen botoa. Diputatu nagusia hautatzeko saioan, lehenengo bozketan hartarako aurkeztutako hautagaiek gehiengo osoa lortu behar dute batzarkideen artean. Inork ez badu, bigarrenez egingo dute bozketa, eta batzarkideen artetik boto gehien lortzen duena izendatuko dute diputatu nagusi —hor berdinketa badago, hauteskundeetan boto gehien erdietsitako taldeko hautagaia izango da ahaldun nagusi—.

«Hauteskundeetan nonbait geu bagara lehen indarra eta beste talderen batek bozkatu nahi bagaitu, babesa jasoz gero, bakarrik gobernatzen saiatuko gara», iragarri du Uriartek. «Lehen indarra ez garenetan ere irizpide bera erabiliko dugu: geure buruari botoa». Horrez gain, aldundietako gobernu itunik ez du nahi. «Erkidego honetan lau indar handi daude [EAJ, EH Bildu, PSE-EE eta PP]; lurraldeka, aniztasuna dago boterean; ibilbide handiko taldeak dira guztiak, eta gu, aldiz, berriak. Ahal Dugu indartuz eta egonkortuz joatea da gure estrategia, eta ez gara besteen jokoan sartuko. Gobernu itunak egiteko gauza ez dugu ikusten oraindik geure burua».

Uriartek ez du hasi nahi espekulatzen; adibidez, Gipuzkoan EH Bildu izango ote den lehen indarra eta Ahal Dugu-ren babesa beharko lukeen, edo Araban zer aukera leudekeen. Nafarroan, hura baino garbiago mintzatu da Laura Perez idazkari nagusia: akordioetatik baztertu dituen bakarrak UPN, PSN eta PP izan dira, eta UPNren gobernu alternatiboaz hitz egin du.

Barne kontsultaren aukera

Azaldutako hori da EAEko zuzendaritzaren irizpidea —taldeak hilabete baizik ez darama martxan—, baina erkidegoan alderdian izena emanda dauden hamabi mila lagunetatik %10ek inbestidurari edota gobernu akordioei buruz barne kontsulta egin behar dela eskatzen badute, egingo dute galdeketa, Podemosen antolakuntza dokumentuko 22. artikuluak ematen baitu aukera. «Nik uste dut egitekotan bi kasu hauetan baino ez litzatekeela egingo kontsulta: inbestiduraz eta gobernu akordioaz. Legealdian, aurrekontuen edo bestelako gai zehatzen inguruko erabakiak tokian tokiko taldeek hartuko dituztelakoan nago, betiere geure politika orokorrak kontuan hartuta».

Uriarte ziur dago EAEko erabakiak erkidegoan hartzen segituko dutela, nahiz eta alderdiaren antolakuntza irizpideen 8. artikuluak dioen Herritarren Estatu Biltzarrari dagokiola «Podemos osoan eragiten duten erabakiak hartzea, zernahi ere den gaia (sektorea edo lurraldea)». Duela bi aste, foru hauteskundeetara marka propioarekin aurkeztu ala ez eztabaida izan zuten estatuko zuzendaritzakoekin; Madrilgoek «marka zuriarekin» aurkez daitezen nahi zuten, baina Uriartek-eta lortu zuten Ahal Dugu modura aurkezteko erabakia aurrera ateratzea. «Garbi zegoen erabakia EAEn hartuko zela, ez Madrilen, baina konbentzitu egin nahi genituen. Hauteskunde osteko kontuak ere hemen erabakiko ditugu. Ez dut uste PSNri gertatu izan zaiona gertatuko zaigunik; Madrilek ez du eskurik sartuko».

Gehiengo osorako, 26 boto

Batzar Nagusietan gehiengo osoa izateko 26 batzarkide behar dira, 51 lagunek osatzen baitute ganbera. 2011n, inork ez zuen lortu halakorik Araban, Bizkaian eta Gipuzkoan. Araban PP izan zen garailea, 16 aulkirekin; bigarren, EAJ, 13rekin. Bizkaian, EAJ nagusi, 22rekin; bigarren, Bildu, 12rekin; eta Gipuzkoan, Bildu gailen, 22rekin; bigarren, EAJ, 14rekin.

Datozen bozetan ere ez da aurreikusten gehiengo osorik Batzar Nagusietan. Bi hilabete pasatxo falta dira maiatzaren 24rako, eta, gaur-gaurkoz, EAEko Ahal Dugu-k daukan irizpidea dauka. Harengan ere pisu handia dute Espainiako hauteskundeek. Kongresurako bozak udazkenean izango dira; Podemosek gobernura iristea du xede, eta, ordura arte, estatuko zuzendaritzak bereziki zaindu nahi ditu Hego Euskal Herriko mugimenduak ere.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Eba Blanco (erdian), azaroko biltzarrean, idazkari nagusi izendatua izan ondoren. ©JAVIER ZORRILLA / EFE

EAren primarioak errepikatzeko aginduaren aurkako helegiteak aztertuko dituzte

Xabier Martin

Espainiako Auzitegi Gorenak EAren eskaera tramitera onartu du, eta alderdiaren primarioak errepikatzea agindu zuen probintzia auzitegiaren epaia balekoa den ala ez erabakiko du.

Donostiako Renferen geltokia. ©GORKA RUBIO / FOKU

Beste geltoki bat aldiriko trenen transferentziaren lokarria askatzeko

Xabier Martin

Laster egingo dute Gasteizek eta Madrilek aldiriko trenen eskuduntza gerturatuko lukeen bilera

Senpereko herriko etxeko oposizioak ere dimititu egin du

Senpereko herriko etxeko oposizioak ere dimititu egin du

Arantxa Iraola

Urrian hautetsi hainbatek utzi zuten kargua, auzapezaren kudeaketa ereduarekin kritiko

Beatriz Artolazabal eta Ramiro Gonzalez, gaur, Gasteizen ©L. Rico / Efe

Gasteizerako proiektu «kontinuista eta berritzailea» gidatuko duela esan du Artolazabalek

Edurne Begiristain

EAJren Arabako Lurralde Batzarrak Arabako hiru barrutietarako hautagaiak berretsi ditu gaur. EH Bilduk oniritzia eman die Arabako zortzi udalerrietako zerrendaburuei, eta Ahal Dugu-k hiriburuetako hautagaiak aurkeztu ditu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...