Webgune honek cookie-ak erabiltzen ditu zure nabigazioa errazteko, publizitatea erakusteko eta analisi estatistikoak egiteko. Nabigatzen jarraitzen baduzu, hauen erabilera onartzen duzula ulertuko dugu. Informazio gehiago nahi baduzu, kontsultatu Cookie Politika

X

Berria.eus

Kirola Gora, behera, eta berriz gora

Publizitatea

Kirola

Gora, behera, eta berriz gora

Espero ez zituen egoerak egokitzen ari zaizkio sasoi honetan Ander Capa Eibarreko jokalariari: partida batzuetan jokatu gabe egon zen, eta, berriz jokatzen hasi zenean, Bartzelonaren eskaintza ere jaso omen zuen.
Argazkia: VILLAR LËPEZ / EFE

2017-04-21 / Aitor Manterola

Eibarreko eskuin hegalaren jabe eginda dabil azken denboraldietan Ander Capa (Portugalete, Bizkaia, 1992). Bigarren B Mailan hasi, eta Lehen Mailara arte, gora eta behera ibili da korrika. Aurreko denboraldira arte zelai erdiko marratik aurrera, eta, Jose Luis Mendilibar denetik entrenatzaile, zelai erditik atzera.

Denboraldi honetan, hala ere, hegalaren jabetza hori galdua izan du une batez Capak. Horren ondorioz, jokalariak behera egin zuen animoz, ezusteko egoera izan baitzen berarentzat. Mendilibarren kate motzak ez daki zer den urteetako ibilbidea, egunean-egunean erakutsi behar dio jokalari bakoitzak ondo ari dela. Capari abisua eman zion iazko urriaren 30ean. Ipuruan izan zen, Vila-realen aurka. Eibar galtzen ari zen, eta Caparen erasoko ekarpena ondo zetorkion taldeari, baina entrenatzaileak aldatu egin zuen 73. minutuan.

Ondorengo lau partidetan ez zuen alerik jokatu, eta aulkian egon zen eskuin hegaleko jokalaria. Orduan, aitortu zion BERRIAri gaizki pasatzen ari zela, eta etsiak jotzear zegoela ere kontatu zuen: ┬źGogorik gabe bezala ari naiz, eta badakit jokatu eta gauzak ondo eginda ere ez dudala lekurik hamaikakoan┬╗. Bosgarren partidan izan zuen hamazazpi minutu jokatzeko aukera, Alavesen aurka, baina berak esandakoa bete zen hurrengoan: Leganesen aurkakoan ez zuen batere jokatu. Behera berriz ere animoz, baina ez luzerako.

Jarri zuen Mendilibarrek berriz ere hasieratik Gabonetako etenaldiaren ondorengo lehen partidan, eta gaur arte. Gora berriz ere Capak, eta zelaian gora eta behera. Eta oso gora, beste talde batzuen balizko fitxaketen zerrendan egoteraino. Bartzelonak nahi zuela zabaldu zen, Aleix Vidalen falta betetzeko. Eskaintza ere egin omen zion Kataluniako taldeak, denboraldi honetan utzita joateko, baina Eibarrek ez ei zuen onartu. Orain berriz ere hasi da zarata, eta Bartzelonak Capa fitxatu nahi omen du datorren denboraldirako. Athleticek ere begiz jota daukala zabaldu da.

┬źGauza handia da horrelako talde handiek niregan interesa izatea, eta polita ere bai. Baina nire ordezkariari eskatu diot ez esateko niri ezer kontu horietaz denboraldia amaitu arte┬╗, aitortu zuen atzo Arrasaten (Gipuzkoa), entrenamendua bukatutakoan kazetarien aurrean egindako agerraldian. ┬źDatorren denboraldirako ere kontratua daukat Eibarren, eta liga hau bukatzeko sei jardunaldi falta dira oraindik┬╗, gehitu zuen. Galdera zuzen-zuzena egin zitzaion, ea Bartzelonaren eskaintzari ezetz esan dakiokeen. Garbi mintzatu zen Capa: ┬źEzin zaio ezetzik esan┬╗. Laster argituko dira kontuak haren etorkizunaren inguruan, denboraldi amaiera gainean baita.

Norbera pozik denean, eta olatuaren aparrean, ez omen da txarra izaten atzera begiratzea, eta ondo gogoan dauzka denboraldi honetan igarotako garai txarrak: ┬źGaizki egon nintzen, eta kanpora begira ez nuen triste itxura eman nahi. Etxean sufritzen nuen gehien┬╗, kontatu zuen atzo. ┬źBaina eman diot buelta, eta gauzak ondo egiten ari naizen seinale da talde handiren batzuk nire atzetik ibiltzea┬╗.

┬źAthleticzalea naiz┬╗

Ustez bera segika ari den talde horietako bat oso berezia da berarentzat: ┬źBeti izan naiz Athleticen zalea, umetatik, aitak hori sartu izan zidalako┬╗. Bere betiko taldea eta egungoa aurrez aurre izango dira astelehenean Ipuruan, eta onartu du berezia izango dela beretzat: ┬źEz da beste partida bat niretzat, baina Lehen Mailako lehia guztiek sortzen didate aparteko zirrara┬╗.

Antzeko zerbait sentitu zuen Athleticeko harrobiko jokalari zela ere: ┬źHiru denboraldiz egon nintzen Lezaman, gaztetxoetara iritsi arte, eta ondo gogoan daukat nola joan ginen Bruneteko Txapelketa jokatzera [Espainia]. Esan zidaten ondo jokatu nuela┬╗, gogoratu du, barrezka, atzelari bizkaitarrak. Ea astelehenean ere loreak jasotzen dituen.

Publizitatea

Sortu kontua

Publizitatea