Albistea entzun

Lurrinak eta ardoak, elkar hartuta

Maddalen Marzolek eta Dani Cormanek lurrinak eta ardoak batzen dituzten dastatzeak egiten hasi dira.Bi mundu horiek uste baino lotura handiagoa dute.
Maddalen Marzol, ardo botila batekin, eta Dani Corman, lurrinekin.
Maddalen Marzol, ardo botila batekin, eta Dani Corman, lurrinekin. GORKA RUBIO / ARGAZKI PRESS

Ainara Arratibel Gascon -

2014ko ekainak 21 - Donostia

Zer lotura dute Jean Paul Deville Carte Noire xanpainak eta Diptyqueren L'Eau des Hesperides lurrinak? Eta Eric Bordelet Poire Authentique ardoak Annick Goutalen Petite Cherie lurrinarekin? Maddalen Marzol lurrinetan adituaren usaimenak eta Dani Corman sommelierraren dastamenak eta usaimenak bi mundu horiek batu, eta zentzumenetarako ezohikoa den eskaintza bat aurkeztu dute: ardoak eta perfumeak batzen dituen dastatzea. Izan ere, jendeak uste baino lotura handiagoa dago bi mundu horien artean. «Zenbat eta gehiago sakondu, konturatzen zara lotura handia dagoela bi munduen artean, eta ikusi behar direla beste edozein arte espresio moduan», azaldu du Marzolek.

Lehenagotik, Marzolek bazuen esperientzia halako dastatzeak antolatzen. Duela urte batzuk, DiVinesek, Terrassan (Herrialde Katalanak) ardo dastatzeak antolatzen dituen neska talde batek, halako saio bat antolatzeko proposamena egin zion. Marzolek erronka onartu zuen. «Nik, berez, ez dut ardoez ulertzen, baina haiek ardoen ezaugarriak azalduta, egiteko modukoa iruditu zitzaidan. Oso gauza interesgarria eta polita da». Orain, Kmon ikasle elkarteak bultzatuta, eta Urbieta lurrin dendarekin eta Essencia ardo dendarekin elkarlanean, Euskal Herrira ekarri dute esperientzia hura. Aurreneko dastatzea duela aste batzuk egin zuten, Donostian, Londres hotelean, eta saio gehiago antolatzeko lanean ari dira. «Guretzat oso esperientzia aberasgarria izan zen. Jendea hasieran apur bat lotsatuta zegoen. Zer eskainiko genion ikuskizun zegoen. Baina dastatzea aurrera joan ahala, izugarri disfrutatu zuten», azaldu du Cormanek. Jendeari ardoen eta lurrinen mundua era berritzaile batean erakusteko aukera ematen dute halako dastatzeek. «Guk aurkezten ditugun ardoak eta lurrinak, gainera, bereziak dira. Ez dira ohiko saltokietan aurkitzen diren horietakoak. Horrek ez du esan nahi elitistak direnik. Denen eskura daude», azaldu dute.

Biek berretsi dute ardoen eta lurrinen artean dagoen lotura. Hala, lurrinen mundua gustuko duenari usain berriak deskubritzen dizkio ardoak. «Usaimenaren eta dastamenaren artean sortzen den kontrastea ere handia izaten da batzuetan. Ardo bat usaindu, eta, zenbait kasutan, espero ez duzun zapore batekin egiten duzu topo dastatuta. Oso esperientzia aberasgarria da», azaldu du Marzolek. Ardoa gustuko dutenen kasuan, zenbaitetan gehiago disfrutatzen dute usaintzen dastatzen baino. «Niri behin baino gehiagotan geratzen zait hori. Beraz, perfumeek beste usain batzuk ezagutarazten eta deskubritzen dizkizute, eta horrek zure usaimena zabaltzen laguntzen dizu. Nire lanbiderako oso inportantea da hori».

Gainera, biek nabarmendu dute dastatze guztietan aurkitzen eta deskubritzen direla gauza berriak. «Saio bakoitzean ardo eta lurrin berriak aurkezten dira».

Lehenbizi, aukeraketa

Ardoak aukeratzea izaten da aurreneko lana. Hori Cormanek egiten du. «Garrantzitsuena, noski, ardo onak izatea da. Baina, hortik harago, nortasun oso markatua duten ardoak izan behar dute, usain garbikoak eta elkarren artean oso desberdinak. Eta, noski, ordena logiko batean aurkeztu behar dira, dastamen papilak prestatzen joatea». Lehen dastaketarako ondorengo ardoak hautatu zituen: xanpain bat, manzanilla bat, Alsaziako ardo zuri bat, Ribera del Dueroko ardo beltz bat eta udareekin egindako ardo bat. «Xanpaina, apartsua izanik, oso aproposa da hasteko. Karbonikoak eta garraztasunak papilak aktibatzeko balio dute. Hortik aurrera, kontrastea lortzen saiatu nintzen. Manzanilla oso lehorra da, eta, beraz, ondoren ardo fruitutsu, tropikal eta gozo bat sartzea zen onena. Horregatik aukeratu nuen Alsaziakoa. Behin hiru ardo dastatuta, papilak prest zeuden. Beraz, bolumen, pisu eta indar handiko ardo bat sartzeko unea zen: Ribera del Dueroko beltz bat. Udareekin egindako ardoarekin, freskotasuna lortu nuen. Horrela, jendea fresko geratzen da, gehiagorako gogoarekin».

Horren arabera, lurrinak proposatu zizkion Marzolek. «Zenbait kasutan ez da erraza izaten ardoarekin bat datorren lurrina topatzea. Izan ere, ardo batek, adibidez, lurrin zitriko fresko eta gozo bat eska dezake. Baina konbinazio hori ez da ohikoa lurrinen artean». Topatzea gehien kostatu zitzaien bikotea manzanillarena izan zen. « Mediterraneoa ardatz hartuta, Lorenzo Villoresik egindako perfume bat aukeratu nuen azkenean, eta bien gazitasuna asko gustatu zitzaion jendeari»

Aukeraketa egiterakoan ez bezala, dastatzean lehenbizi perfumea aurkezten du Marzolek. Jendeak usaindu ostean, Cormanek ardoari buruzko xehetasunak eman, eta bien artean dagoen lotura azaltzen du.

Dena den, dastatzetik harago, Cormanek eta Marzolek ardo eta lurrin bakoitzaren atzean dagoen istorioa kontatzen dute. «Horrela jendeak are gehiago disfrutatzen du, badakielako zer eta nondik datorren probatzen ari dena».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Bastidako (Nafarroa Beherea) Maddi Leglisek irabazi du aurtengo Baionako xingarraren feriako azpi lehiaketa. ©BOB EDME

Xingar feriak aro berria

Ainize Madariaga

Pazkoz ireki beharrean atzo ireki ditu bortak Baionako 558. Xingar Feriak. Lau egunetik hirura laburtu dute, igandera arte, eta karpa erraldoi batean bildu. Ostatuak gauerdian hetsiko dira.
 ©EIDER EIBAR

Beste aldetik dator erantzuna

Iker Tubia

Adimen artifiziala erabilita hildako pertsona baten gisan erantzun dezakete txatbotek, edo izan daitezke konpainia egiten duen lagunaren ilusioa, Replika aplikazioa bezala. Galdera, zalantza eta arazo anitz sortu ditzake teknologia horrek filosofiaren eta psikologiaren ikuspegitik.

 ©ANDONI CANELLADA / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna