Izkinetan dago zuloa

Edozein partida eta edozein aurkari izaten da zitala txapelketa luzeetan. Baita ere berez jokoan ezer ez daukatenak sailkapenari begiratuta. Gertatzen dira erabakigarriak egoera horretan, eta galdetu bestela Elezkano II.a-Zabaleta eta Altuna III.a-Barriola bikoteei. Atzo Binakako Txapelketan gertatu zenak ondo erakusten du hori.

Liderrak zituzten parean Elezkano II.ak eta Zabaletak Labriten 11. jardunaldian, finalerdietara sailkatuak dauden Irribarria eta Rezusta. Jokoan ezer ez berez, eta aukera ona zen urdinentzat sailkapena bideratzen hasteko. Baina ligaxkako bikote onena gailendu egin zitzaien, eta zaildu egin diete bidea hurrengo koskara pasatzeko. Ez zitzaien asko falta izan Elezkano II.a-Zabaletari garaipena lortzeko, hemezortzi tantora iritsi zirelako, baina azkenean, alerik gabe joan behar etxera.

Emaitza estu samarra izanagatik, ia beti atzetik joan ziren galtzaileak, hasieran izan ezik. Berdinketak ere izan ziren, azkenekoa 18nakoa, baina Irribarriak bere nagusitasuna azaldu zuen. Hamalau tanto egin zituen aurrelariak. Elezkanok hamar egin zituen, baina aldea atzean egon zen: Rezustak bakarra eman zuen, eta Zabaletak bost.

Eguneko beste partidan, aukera ona zeukaten Altuna III.a-Barriolak bolada ezin txarragoa iraultzeko, parean Urrutikoetxea-Imaz azken sailkatuak izanda. Baina Markina-Xemeinen ere, jokoan gutxiena zuen bikoa garaile izan zen, nahiz eta oraindik aukera batzuk bai izan sailkatzeko. Urrutikoetxearen jarduna izan zen erabakigarria, eta azkeneko tantuak erakusten du hori ondoen. 21na ziren, galtzaileek 19-13koa berdintzeko gai izan eta gero. Urrutikoetxeak erabaki zuen lehia, arrisku handiak hartuz. Atzo ere puntu alerik gabe bukatuta, lehen zaila zutena are gehiago zaildu zaie Altuna III-Barriolari. Azkenak dira orain.

Gaur itxiko da jardunaldia

Azken-laugarrengo jardunaldiari gaur emango diote akabera Tafallan (Nafarroa). Victor-Albisuk aurre egin beharko diete Ezkurdia-Merino II.ari. Bigarren dira aurrenekoak, eta aukera daukate pauso erabakigarria izan daitekeena emateko finalerdietarantz. Ezkurdiak eta Merino II.ak galduko balute, aldiz, asko zailduko litzaieke aurrera jarraitzea, lau garaipen baino ez baitituzte.