Webgune honek cookie-ak erabiltzen ditu zure nabigazioa errazteko, publizitatea erakusteko eta analisi estatistikoak egiteko. Nabigatzen jarraitzen baduzu, hauen erabilera onartzen duzula ulertuko dugu. Informazio gehiago nahi baduzu, kontsultatu Cookie Politika

X

Berria.eus

Bizigiro Arabarren aroa eskolartekoan

Publizitatea

Bizigiro

ATZEKOZ AURRERA

Arabarren aroa eskolartekoan

Aroa Arrizubieta Barredo gasteiztarrak jantzi du Euskal Herriko eskolarteko bertso txapelketako txapela. Giro bikainean iragan da Saran antolatutako festa eguna.
Aroa Arrizubieta Barredo, Euskal Herriko eskolarteko bertso txapelketako txapelarekin kantatzen, atzo, Saran (Lapurdi).
Argazkia: ISABELLE MIQUELESTORENA
Arabar batek jantzi du lehen aldiz Euskal Herriko eskolarteko bertso txapelketako txapela: Aroa Arrizubieta Barredo gailendu zen atzo goizean Sarako (Lapurdi) Pleka trinketean jokatu zen finalean. 17 urteko gasteiztarraren gibeletik gelditu zen Leitzako (Nafarroa) Joanes Illarregi Marzol. Euskal Herriko zazpi probintzietatik etorritako hamahiru bertsolari lehiatu ziren, giro onean.

Goizetik, giro berezia senti zen Pleka trinketean. «Nahasia naiz, denek ebakia eskatzen dute», zioen larrituta ostatuko zerbitzariak. Ohiko bezeroez gain, gazte, guraso eta bertsozale andana bildu zen bertsolari gazteen urteroko txapelketa ikustera. Hori nabarmendu zuten, halaber, Sarako bertso eskolako haurrek ere, eguna hasteko kantatu zuten agurrean. «Gira», «gera», «gara», nahasketa bat entzuten zela ohartuta, «tindatu diguzue margo anitzez Sara/ beste egunetan baino ederragoa da», adierazi zuten, txalo zaparrada artean. Umore anitzekin aritu ziren, azken bertsoan «onenak irabaz dezala» bukatuta. Baina azken puntuaren errepikarentzat, metal musikaren zaleen gisan bi hatzak airean eskua altxatu, eta «Julene Etxeberrik irabaz dezala!» oihu eginez bukatu zuten, beren bertso eskolako kide ohia animatuz. Irri algaraz hartu zuten entzuleek.

Bosna bertso kantatu behar izan zituzten lehen fasean hamairu bertsolariek, hasierako agurra lehenik, eta bina bertso zortziko handian eta txikian, ofizioka. Bertso gutxi dira; akatsik egiten ez duenak izaten du abantaila.

Aktualitateko gaiekin abiatu zuten saioa, Eskoriatzako (Gipuzkoa) Oihana Aranak eta Aramaioko (Araba) Aitor Ugartek, bozkatu ala ez eztabaidan ari diren bi gazteren rolean jarrita. Bozkatzearen aldeko jarrera hartu zuen Aranak: «Zer bestela gertatzen denarekin ezingo zara kexatu». Azkar erantzun zion Ugartek: «Zeren bozkatu eta beraiek nahi dutena egiten dute». Errekaleorreko afera ekarri zuen gogora Aranak, eta Ugartek errefera: «Baina gaur ez dut nik bozkatu, ze nire asmoa ez zen / baina halere segituko dut, nik manifetan kexatzen».

Sei bertsolari pasatu ziren bigarren fasera, hasierako puntuari erantzun eta gai bati bertso bana kantatzeko. Saio puntuagarriaren ondotik, Aroa Arrizubieta Barredo izendatu zuen txapeldun epaimahaiak. Amets Arzallus Euskal Herriko txapeldunak jantzi zion txapela. Ausardiaz kantatzera animatu zituen bertsolari gazteak: «Lagun ona da errextasuna/ lagun hobea ezina/ hormak gaindituz ta normak hautsiz/ segi ezazue aitzina», eta badirudi entzun egin ziola Arrizubietak; Arabako bertsolariei eskaini zien txapela: «Eskerrik asko Muxikakoei/ tratatzearren horrela/ zueri ere sentitu bainaiz/ udalekutan bezela/ familiakoei ta senideei/ ezin zen izan bestela/ ta kritikatu gaituzten denak izorratu daitezela/ arabar batek lortu du-eta Euskal Herriko txapela». Txalo zaparrada artean eta zutik hartu zuten entzuleek. Gustura ageri ziren bertsozaleak, gazte belaunaldiari begira. «Ari direla gazteak», komentatu zuen urteetan epaile gisa aritutako Beñat Soulek.

Bazkaria eta rapa

Izan lezakeen txapelketa irudia kendu nahian, egun guziko festa bilakatu da azken urteetan eskolarteko finala, eta hala izan zen atzokoa ere. Goizeko saioa bukatuta, Idoki tokiko ekoizleen sareak prestatutako bazkaria eskaini zuen Bertsozale elkarteak. Udalekuetan balira bezala, giro onean eta kantuz ibili ziren gazteak, goizeko lehiaren tentsioa alde batera utzita. Bazkaria bukatuta, ikuskizun berezia egin zuten agertokian Odei Barrosok eta Iñaki Viñasprek, bertsoa eta rapa nahasita. Erritmo indartsuan aritu ziren, errimak elkar lotuz jario bizian. Adi beha egon zitzaizkien gazteak; ideiarik eman zieten, agian.

Publizitatea

Sortu kontua

Publizitatea

Gaiarekin zerikusia duten albisteak