Albistea entzun

Memoriaren soinu kartografia

Donostia 2016k 'Rekording' sakelakoetarako aplikazioa sortu du, hiria soinuen bidez bisitatzeko
Aplikazioa ezagutarazteko, antzeztutako soinu ibilaldiak egingo dituzte gaur.
Aplikazioa ezagutarazteko, antzeztutako soinu ibilaldiak egingo dituzte gaur. ANDONI CANELLADA / ARGAZKI PRESS

Ihintza Elustondo -

2016ko otsailak 27 - Donostia

Sakelako telefonoa eskuan, eta entzungailuak belarrietan. Donostia beste modu batera ezagutzeko aukera ematen du Rekording aplikazioak: soinuen bidez, hain justu. Donostia 2016k sortu du 51 audio pista biltzen dituen mapa, hiriaren memorian oinarrituta. Pista guztiek dute abiapuntu bat: gune bat eta gune horri dagokion oroitzapen bat. Funtsean, Donostiako aitona-amonen testigantzen berrinterpretazioak dira, duela 40 urte baino lehenagokoenak. Erabiltzaileek haiek entzun bitartean hirian zehar paseo bat ematea da aplikazioaren xedea. Ohiko ibilaldi bat baino «askoz ere poetikoagoa» izango da, Itziar Zorita proiektuaren arduradunaren arabera.

Android motako sakelakoetan doan deskarga daiteke aplikazioa; horretarako, Google Play sisteman Rekording DSS2016EU bilatu behar da. Androidik ez duenak, www.rekording.eu webgunera jo dezake. Behin aplikazioa martxan jarrita, erabiltzaileari mapa bat agertuko zaio pantailan. Han adierazita daude zein diren pistak entzun daitezkeen Donostiako puntuak. Gehienak erdigunean daude, nahiz eta batzuk pixka bat aldentzen diren Igeldo edo Anoeta futbol zelai ingurura. Hiriko gune batetik bestera mugitu besterik ez du egin beharko erabiltzaileak. Laranja koloreko seinaleak daude lurrean, gune horri soinu pista bat dagokiola adierazteko. Hara iritsitakoan, automatikoki aktibatzen da pista. Esaterako, Alderdi Eder parkekoak gogora ekarriko du Txantxillo pertsonaia ezaguna.

Erabiltzaileak hiriarekin duen loturaren arabera, gehiago edo gutxiago ezagutuko ditu istorioak, baina guztiek ulertzeko moduan azalduta dago haietako bakoitza. Batzuk euskaraz dira, eta beste batzuk, gaztelaniaz.

Audio pista guztiek dute toki eta istorio erreal bat ardatz. Horretarako, Badihardugu elkartearen www.ahotsak.eus artxiboa izan dute baliabide nagusi. Donostiako hainbat lekukotza aukeratu dituzte handik; horietako batzuk bere horretan utzi dituzte, eta gainerakoak moldatu egin dituzte. Horregatik, askotarikoak dira emaitzak: batzuk dokumental itxurako kontakizunak dira, baina beste batzuek gehiago dute fikziotik errealitatetik baino.

Lau motatako soinu pistak

Badihardugu elkartearen ahozko lekukotzez gain, beste hiru motatako soinu pistak daude entzungai: irratirako antzerki sorkuntzak dira batzuk, nerabeek eginak beste batzuk, eta ahanzturaz hitz egiten dutenak gainontzekoak. Irrati bidezko antzerki sorkuntzak Inko Martin eta Alberto de la Hoz artistek egin dituzte, hainbat aktore profesionalekin elkarlanean. La Sonidera kolektiboa, berriz, 14 eta 16 urte bitarteko gazteekin aritu da soinuak eta sormena lantzen. Bestalde, Audiolab soinu laborategiak ahanzturaren bidea jorratu du, gauzak edo pertsonak galdu diren lekuetatik abiatuz.

Aplikazioa ezagutzera emateko, ibilaldi gidatuak antolatu dituzte gaur. 2016 gunetik abiatuko dira 11:30ean, 13:30ean, 17:00etan eta 19:00etan. Izena emateko mezu bat bidali behar da helbide honetara: rekording@dss2016.eu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gari, Josu Zabala, eta Luis Javier Saiz 'Txanpi'. ©Ibai Arrieta

Hertzainak taldeak BECen eta Gasteizen joko ditu azken bi kontzertuak, abenduaren 16an eta urtarrilean

Iñigo Astiz

Barakaldorako sarrerak urriaren 5ean jarriko dituzte salgai, nahiz eta Kutxabankeko bezeroek urriaren 4an izango duten aurresalmentan erosteko aukera. Arabako saioa «bilduagoa» izango dela iragarri dute oraingoz.

Abenduan bi urte egingo ditu itxita Plateruenak ©Aritz Loiola / Foku

Urtea amaitu aurretik ireki nahi dute Durangoko Plateruena

Berria

Udalak adierazi duenez, eredu publiko-komunitario bat mamitzen ari dira orain. Durangoko Azoka igaro ostean zabaldu nahi du.

Patti Smith, atzo, Donostiako Kursaalean. ©Jon Urbe / Foku

Patti Smithek kontzertu gogoangarria eman du Donostian

Mikel Lizarralde

Bere ibilbideko kantu ikonikoak jotzeaz gain, Bob Dylan, Neil Young eta Lou Reeden kantuak berreskuratu ditu.

Claudia Pages artista eta Clara Montero Tabakalerako kultur zuzendaria, Lau Pareta aretoan. ©GOTZON ARANBURU / FOKU

Gerundioaren buelta biolentoa

Itziar Ugarte Irizar

Claudia Pagesen 'Gerundi circular' bideo instalazioa jarri dute ikusgai Tabakaleran, urtarrilera arte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.