Albistea entzun

ANALISIA

Podemosen hautua

Enekoitz Esnaola -

2015eko martxoak 20

Aldaketa soziala» nahi du EAEko Podemos Ahal Dugu-k ere. Instituzioetan nola joan hori lortuz, akordioak egiteke?

Hartu udal hauteskundeak, Donostiakoak edo herri koskor batekoak, eta demagun hauek eskuratu dutela ordezkaritza: EH Bildu; EAJ; Podemosek sustatutako alderdia,«herritar batasuneko» hautagaitza edo hautesle elkartea; PSE, eta PP. Hautatutako zinegotzi guztiak izan daitezke alkategai; inbestiduran, alkategaiek hautetsien artean gehiengo osoa behar dute kargua lortzeko; inork ez badu gehiengo osorik, udal hauteskundeetan boto gehien izan duen hautagaitzako burua bihurtuko da alkate. Jo dezagun EH Bilduk jaso duela udalerri horretako bozetan herritarren boto gehien, baina gehiengo osorik erdietsi gabe —Gipuzkoarako eta toki askotarako ez dirudi adibide irreala denik—, eta inbestidurako bozketa bakarrean ez duela beste inoren babesik gehiengo osorako, besteak beste Podemosek sustatutako hautagaitzak ez duelako busti nahi. Baina jo indar galtzaileen artean ez dela eratu gehiengo absoluturik, besteak beste Podemosen hautagaitzak bere buruari eman diolako botoa. Beraz, EH Bildukoa alkate. Legealdian, Ahal Dugu-koak bere barruan dituen hautagaitzak lortu ahal izango lituzke unean uneko akordioak EH Bildurekin, politika sozial eta ekonomikoan ez duelako ematen alde handirik dutenik: aurrekontu aurrerakoiak, gardentasunerako urratsak, herritarrak ahalduntzeko egitasmoak, zor publikoari buruzko neurriak... Desio duen aldaketa sozialerako lanabesa eta norabidea lituzke.

Hartu Araba, Bizkai eta Gipuzkoako foru hauteskundeak. Orain bi aste erabaki zuenez, bere markarekin izango da Podemos-Ahal Dugu, udalekoetan ez bezala. Ahaldun nagusia hautatzeko sistema desberdina da, ordea. Aurreneko bozketan hartarako aurkeztutako hautagaiek batzarkideen gehiengo osoa erdietsi behar dute. Halakorik ezean, bigarrenez egingo dute bozketa, eta batzarkideen artetik boto gehien batzen duena izendatuko dute diputatu nagusi. Hartu, adibidez, Gipuzkoa, eta demagun ordezkaritza dutenak EH Bildu, EAJ, Podemos, PSE eta PP direla, EH Bildu dela indar nagusia, baina ez duela gehiengo osorik —ez dirudi adibide irreala denik—. Roberto Uriarte EAEko Ahal Dugu-ko idazkari nagusiak esan du Batzar Nagusietako inbestiduran beren buruari emango diotela botoa. EAJk eta PSEk «erakundeen egonkortasunerako» itun garrantzitsua sinatua dute, eta, Gipuzkoan aipatu egokiera suertatuz gero, gehiengo sinple bidez diputaziora heltzeko aukera handia lukete; gainera, ezin da baztertu PPk doako babesa ematea, horrek EH Bilduri boterea hartzea galarazten badio. (Ikusi beharko da hori EAJrentzat zenbateraino litzatekeen zama 2015-2016rako: bake lantaldea, estatutu berria, Eusko Legebiltzarrerako hauteskundeak).

Kasu horretan, kastatzat jo dituenak boterean egonda —Pablo Iglesias: «EAJ ere kasta da: haren aberri bakarra dirua da»—, Ahal Dugu-k zer itxaropen luke legealdian «aldaketa sozialerako» neurriak onartzeko? Haren —Gipuzkoako— jendearen foru botoak baliagarriak al lirateke?

Abenduan, sare sozialetan, kartel bat ibili zen asko dantzan: Ahal Dugu-ren ingurutik sartutakoa zen, eta, PPko ugarirekin-eta batera, Izagirre Donostiako alkatea ageri zen, kastatzat jota. Ahal Dugu-k berak gero zuzenketa egin zuen: Izagirre ezin zela hala hartu, eta haren irudia kendu zuen. Txikikeria bat izan zen. Traola zen han aintzat hartzekoa: #2015empiezaelcambio (#2015hasiadaaldaketa). Ahal Dugu ere, aldaketa esatean, oroz gain Espainiako Estatuko aldaketaz ari da. Baina hori, hastekotan, urte bukaeratik aurrera hasiko da, Kongresuko bozetatik aurrera. Bitartean, EAEko Ahal Dugu, kontraesanak administratzera. Ala?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Euskal presoen eskubideen aldeko protesta bat, artxiboko irudi batean. ©Monika del Valle, FOKU

ELAk euskal presoekiko «jazarpen kanpaina» salatu du

Oihane Puertas Ramirez

Sindikatuak elkartasuna adierazi die presoei laguntzen dieten erakundeei.

Iñigo Urkullu 2019ko Alderdi Egunean, Forondan. ©Jaizki Fontaneda, FOKU

EAJk edukiera mugatuarekin ospatuko du Alderdi Eguna

Oihane Puertas Ramirez

Ekitaldi politiko «xumea» izango dela iragarri dute. Igandean ospatuko dute, Forondan, 12:00etatik aurrera.

Aranzadi elkarteko Lourdes Herrasti eta EHUko Jon Penche, atzoko jardunaldietan, Bilbon. ©MONIKA DEL VALLE / FOKU

Hegoaldeko bi gobernuek batera aritu nahi dute memoriaren arloan

Gotzon Hermosilla

Gerraren eta frankismoaren biktimen erroldei buruzko jardunaldiak antolatu dituzte elkarrekin. «Egiarako eskubidea» gauzatzeko datu baseek duten garrantzia nabarmendu dute adituek
Oihana Garmendia eta Haimar Altuna Sortuko kideak, atzo, Donostian, <em>Kalera Info</em> aldizkari bana eskutan. ©BERRIA

Espainiako Auzitegi Nazionalak 'Kalera Info' ixteko agindu du

Maddi Ane Txoperena Iribarren

Epaileak «ongietorrien bidez terrorismoari gorazarre egitea» egotzita eskatu du aldizkaria eta webgunea ixteko. Sortuk salatu du «oso gertaera larria» dela. Helegitea jarri diote

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.