Albistea entzun

HIZPIDEAK

Hatz markak, aurpegi markak

Alonso eta Maroto, 2006an, Gasteizko udaletxean.
Alonso eta Maroto, 2006an, Gasteizko udaletxean. R.B. / ARP

Jakes Goikoetxea -

2015eko martxoak 6 - @ijitoa

Gasteizko Udalak, Afonso Alonso alkate zela —Espainiako Osasun ministroa da egun—, Gonzalo Anton lagunari udalaren lokal batzuk saldu zizkion 2006an. Urtebetera, Gasteizko Udalak lokal horiexek alokatu zizkion Antoni, hogei urterako, saldutako prezioaren bikoitza baino gehiago ordainduz (6,1 milioi euro). Lehiaketa publikorik gabe. Presaka, 2007ko udal hauteskundeak baino lau hilabete eskas lehenago. Alonsoren beraren ardurapean eta kontrolpean. Udaleko teknikarien operazioari buruzko txostena jaso gabe —garestiegia zela esan zuten gero—. Antonek lokaletan egin zituen obrak ere ordainduta (1,6 milioi euro). Eta, Antonen enpresako mezu elektronikoen arabera, kontratua puztuta, udalak sei milioi euro nola edo hala ordaintzeko. Bi aldeek gotortu egin zuten kontratua, Antonen mesedetan. Anton beti irabazle.

Espainiako Kontu Auzitegiak ia milioi erdi euroko bermea ezarri die Alfonso Alonsori eta haren udal taldeari —Ogasun zinegotzia zen Javier Maroto egungo alkatea—. Alonsok eta Marotok operazioa zuritu dute esanez «interes publikoaren mesedetan» egin zutela. Marotok babestu egin du udal teknikariek gomendatutakoa baino gehiago ordaindu izana, esanez haien iritzia ez dela bete beharrekoa. Gehiago ordaindu nahi zuten, beraz.

Marotorentzat, hiriko arazo nagusia gizarte zerbitzuei iruzur egiten dieten atzerritarrak dira, eta hatz marken bidez kontrolatu nahi ditu. Ez du ezer esaten politikarien aurpegia edo azalaren lodiera kontrolatu beharraz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.