Albistea entzun

Zeruko dohaina lortzeko bidea

Eguzki panelak ekoizteko teknika berri batek energia fotovoltaikoa merkatzeko aukera ireki dezake.

Euskal Herrian garatutako sistemak gaur egungo efizientzia mantentzen du
<b>Zezula fotovoltaikoak egiteko, titanio dioxidoa erabili ordez fulerenoa erabiltzea proposatu dute ekoizpen gastuak merkatzeko.</b>
Zezula fotovoltaikoak egiteko, titanio dioxidoa erabili ordez fulerenoa erabiltzea proposatu dute ekoizpen gastuak merkatzeko. HORUS ENERGY Tamaina handiagoan ikusi

Juanma Gallego -

2016ko martxoak 27

Zelula fotovoltaikoak garatzeko teknika berria eta merkeagoa aurkeztu dute Polymat, Ikerbasque eta IK4 CIDETEC erakundeetako ikertzaileek. Teknikaren asmatzaileen arabera, bide hori jorratuta, fabrikazio kostuak nabarmen jaitsiko lirateke, zelulak ekoizteko beharrezkoa den tenperatura handiko tratamendu bat saihesten delako.

Ikerketaren emaitzak ChemSusChem aldizkarian plazaratu dituzte IK4-CIDETEC fundazioko Ramon Tena-Zaera fisikariak eta EHU Euskal Herriko Unibertsitateko Polymat institutuko Juan Luis Delgado kimikariak. Oinarrizko ikerketa bat bada ere, etorkizunean metodo hori industrian txertatzea posible izango dela espero dute zientzialariek. Delgadok azaldu duenez, proposatutako zelula berri horiek gaur egun gehien erabiltzen diren materialen antzeko efizientzia dute, baina ekoizpen prozesua asko merkatzen da.

Gaur egun, titanio dioxidoa erabiltzen da plaka fotovoltaiko gehienetan. Material hori, ordea, 500 graduko tenperaturan berotu behar da plaketan txertatu ahal izateko. Delgadoren arabera, aurkeztu berri duten metodoan, titanio dioxidoa erabili ordez fulerenoak erabiltzen dituzte. Karbonoaren deribatu horiek eta perovskita izeneko materiala erabilita, energia bihurketan %22tik gorako eraginkortasun maila lortu dute ikertzaileek.

Beste abantaila bat materialen malgutasuna da, plaka horiek edozein azaletan txertatu baitaitezke. «Perovskita aspalditik ezagutzen da, baina eguzki-energiarako aplikazioa orain dela zortzi edo bederatzi urte hasi zen. Hasierako emaitzak ez ziren izan espero bezain onak, baina orain dela lau urte inguru iraultza bat egon zen, %15eko efizientziak deskribatu zirenean».

Benetako kostuak

Energiaren alorrean, eraginkortasun maila faktore garrantzitsua da teknologia bat erabilgarria ote den erabakitzeko orduan. Kasu honetan, eguzkitik jasotako energiari zenbaterainoko probetxua ateratzen zaion deskribatzeko erabiltzen dira efizientzia ehuneko horiek, eta, horregatik, ahalik eta zifrarik handiena lortu nahi da.

Ez da faktore bakarra, ordea. «Gaur egun, %20ko eta %30eko efizientzietara heltzen da; baina industrian, iraunkorra eta ekoizteko merkea den materiala bilatzen da, batez ere. Sateliteetan edota Nazioarteko Espazio Estazioan, adibidez, material garestiak erabil daitezke efizientzia maila handiak lortzeko. Oro har, baina, fabrikazio kostuak oso handiak badira, industriari berdin zaio %25eko efizientzia lortzea, eguneroko bizitzan txertatzea ezinezkoa izango delako».

Energia mota horren defentsa sutsua egin du Delgadok: «Askotan, energia fotovoltaikoari fabrikazio kostu handiak edukitzea leporatzen zaio, erregai fosil eta gainerako energia iturriekin alderatuta». Adituaren arabera, orduko kilowatt kostuak kalkulatzen dira beti, «baina ez dira aipatzen horiek dituzten beste hainbat kostu: ingurumenean izaten dituen eraginak, kutsadurak sorrarazitako gaixotasunak, edota istripuak gertatzen direnean egin beharreko garbiketa lanak, besteak beste. Horiek guztiak, ordea, ez dira sartzen orduko kilowatt kalkuluetan», nabarmendu du.

Oinarrizko ikerketan egiten diren aurrerapenek etorkizunean izango duten ibilbidea igartzea eta zehaztea zaila dela onartu du Delgadok, eta, horren harira, orain erabiltzen diren teknologiaren hastapenak ekarri ditu gogora: «Gaurko energia fotovoltaikoa silizioan oinarritzen da, baina material horren zelula bat deskribatu zuen lehen artikula 1956. urtekoa da. Ikerketa horretan, %5eko efizientzia lortu zen».

Garai hartan, beraz, silizioa ez zen energia eskuratzeko material erakargarriena; Delgadok azaldu duenez, ordea, sateliteen garapenarekin eta espazio lasterketaren bultzadarekin, %30eko efizientzietara heldu zen laborategietan. «Ikerketa asko egin eta gero lortu zen teknologia hori eguneroko bizitzan txertatzea».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zumaian (Gipuzkoa) eguerdian egin dute ziztadak gaitzesteko elkarretaratzea. ©Urola Kostako Hitza

Eraso matxistak salatu dituzte Donostian, Gasteizen eta Algortan

Berria

Donostian lau emakumek ziztadak salatu dituzte, eta Zumaian eta Algortan banak. Elkarretaratzeak egin dituzte hiru leku horietan erasoak gaitzesteko. Donostian, gainera, gizon bat atxilotu dute bere bikotekideari laban batekin eraso egiteagatik.

XEEK taldeak Maulen ezarri duen afixa bat, atzoko protestarako. ©G. FAUVEAU

Espekulazioaren kontra protesta egin dute Maulen

Oihana Teyseyre Koskarat

Etxe agentzietan itzuli bat osatuz egin dute manifestazioa, eta salatu dute kostaldean dagoen etxebizitzaren krisia Zuberoara heltzen ari dela

Joxean Muñoz Otaegi eta Amagoia Gurrutxaga Uranga, Donostian. ©Maialen Andres, FOKU

«Utopien funtzioa energien aktibazioa da»

Jon O. Urain

Nola irudikatu gizarte hobeak, ipar gisa hartu eta bideari ekiteko. Utopiak ez dautza gatazkarik ezean, Martinezen ustez, gatazka «modu justuagoan» kudeatzean baizik. Gizarte hobeak ez baitira «zerutiarrak»: «Beti egongo dira egitekoak».

Ilustrazioa: Eider Eibar. ©

«Utopien funtzioa energien aktibazioa da»

Jon O. Urain

Nola irudikatu gizarte hobeak, ipar gisa hartu eta bideari ekiteko. Utopiak ez dautza gatazkarik ezean, Martinezen ustez, gatazka «modu justuagoan» kudeatzean baizik. Gizarte hobeak ez baitira «zerutiarrak»: «Beti egongo dira egitekoak».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.