Albistea entzun

Eusko Legebiltzarrerako hauteskundeak. Iritziak. ANALISIA

Urkulluk amestua

Tamaina handiagoan ikusi

Felix Iriarte - Kazetaria

2016ko irailak 26

1. Emaitzak. Inkestek, gutxi gorabehera, asmatu egin dute kasu honetan. Akaso, Elkarrekin Podemosi gehiago iragarri zioten, eta besteei zerbait gutxiago, baina sorpresarik ez da izan. EAJk oso garbi irabazi du, EHBilduk lau eserleku galdu arren oposizioko lehen alderdia izango da, eta Elkarrekin Podemosen mehatxua notarekin gainditu du. EAJrengandik urrun, oso urrun ere esan daiteke, baina aldi berean hirugarrena ere urrun. Legealdiko uzta jaso du ezker abertzaleak: euskal politikagintzan zentralitatea lortzeko bidean urrats sendoa eman duela erakusten du atzoko emaitzak. Oraindik badu bide luze bat egiteko, baina lau urte hauetan egindakoak merezi izan duela ondorioztatu daiteke.

Dudarik gabe galtzaileen zerrendan PSE agertzen da punta-puntan. Eta eskerrak ez duen galdu inkestek zioten guztia. Baina hamaseitik bederatzira jaisteak izen bakar bat du: jipoia. Berriro pentsatu beharko dute merezi duen jeltzaleen makulua izatea. Apustua egingo nuke ez direla izango, baina, erabaki hori hartzeko, hauteskundeen emaitzez gain beste kontu batzuk indarra izango dute, Madrilgo gobernuaren gora-beherek esaterako. PPk, bestalde, badaki sozialistak ez direla beraiek baino gehiago erkidegoan, eta hori ez da gutxi Madrilgo Genova kaletik begiratuta, eta jakina da handik eta handik bakarrik aztertzen dituztela hemen gertatzen direnak.

2. Jaurlaritza. Norekin gobernatuko du Urkulluk? Bakarrik, ez baitu inoren beharrik. 38ra iristeko lau aukera ditu, eta unean uneko aliantza lor dezake nahi duenarekin. Zertarako, orduan, alderdi bakar batekin akordioa egin. Gainera, Bilduren eta Elkarrekin Podemosen eserlekuak batuta ez dute jeltzaleen kopurua lortzen. Seguruenik, PSEk nahiago izango du oposiziotik ezkerreko ezaugarriak berreskuratu, EAJrekin aliantza egiteak lausotu egingo baitio hain premiazkoa duen hori. PPk, berriz, ez dio dohainik ezer emango, Madrilen hemen emandakoaren ordaina eskatuko baitio eta jeltzaleek ez dute horren beharrik. Elkarrekin Podemosek argitu beharko du zer izan nahi duen, baina ez du ematen lehentasuna jeltzaleekin gobernatzea duenik. Ez zen ulertuko eta politikan gauza ulergarriak egin behar dira. EH Bildu orduan? Ez dute nahi ez batak ez besteak.

3. Madril. Erkidegoko emaitzen esperoan zeuden Madrilgo agintariak eta iritzi emaileak. Kontua zen jeltzaleek sozialisten edo popularren beharra izatea gobernagarritasuna bermatu ahal izateko, horren truke pauso bat ematko Madrilen alde batera edo bestera. Ez da hala gertatuko, edo bestela esanda: EAJ baldintza hobeagoan dago bati zein besteari, Sanchezi edo Rajoyri, euskal agenda deritzotena exijitzeko balizko negoziazioan. Bestela, konpon dezatela Madrilen euren kontuak jeltzaleei erreparatu gabe.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Auzipetuetako batzuk eta zenbait abokatu, uztailean, Espainiako Auzitegi Nazionalaren aitzinean. ©MARTA JARA / FOKU

CNIk uko egin dio 13/13 auzian parte hartu zuten agenteak identifikatzeari

Maddi Ane Txoperena Iribarren

Espainiako zerbitzu sekretuen arabera, legeak eragotzi egiten dio halako datuak ematea. Guardia zibilek onartu egin zuten CNIk ikerketan esku hartu zuela. Bihar jarraituko du epaiketak, Madrilen

 ©JON URBE / @FOKU

Euroeskualdeak herritartasun bateratu bat sustatu nahi du

Iosu Alberdi

2021-2027 Plan Estrategikoa aurkeztu dute, lankidetza sustatzeko asmoz. Europako Batasunarentzat eredu izatea dute xede

Egiari Zor fundazioaren prentsaurrekoa, atzo. ©GORKA RUBIO / FOKU

Mina aitortzeko eskatu dute estatuaren biktimek

Oihane Puertas Ramirez

Egiari Zor fundazioaren arabera, azken asteetan «estatu terrorismoaren gorespen eta apologia adierazpen esplizituak» jasan dituzte

Agus Hernan Foro Sozial Iraunkorreko bozeramailea hizketan, artxiboko irudi batean. ©Jaizki Fontaneda, FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.