Albistea entzun

Usansolo udalerria bideragarria litzateke

Ondorio horretara iritsi da EHUk egindako ikerketa.

Galdakaok ere bideragarritasuna mantenduko luke.

Usansolo Arratiako Mankomunitatearekin elkarlanean aritzera aholkatzen dute
Ezkerrean, Ander Bilbao ikerketaren egilea.
Ezkerrean, Ander Bilbao ikerketaren egilea. MONIKA. DEL VALLE / ARGAZKI PRESS

Gotzon Hermosilla -

2014ko urriak 29 - Bilbo

Ez da ameskeria. Usansolo (Bizkaia) udalerri bilakatuko balitz, ekonomikoki bideragarria litzateke. Hala baieztatu du EHU Euskal Herriko Unibertsitateak egindako ikerketa batek. Galdakaok ere bere kaudimena eta funtzionamendua mantenduko luke, diru sarrerak handitzeko neurriren bat hartu beharko lukeen arren. Usansolok inguruko herriekin zenbait zerbitzu partekatu, eta batez ere Arratiako Mankomunitatearekin elkarlanean aritzeko gomendioa ageri da ikerketan.

Ander Bilbao EHUko Ekonomia ikasleak egin du ikerketa, gradu bukaerako lan gisa, eta Yolanda Jubeto Ekonomian doktore eta EHUko irakasleak zuzendu du. Orain arte egindako azterketa guztiak aletzen dira ikerketan, hots, Hiri Lur enpresak 1988an egindakoa, IKEIk 1989an egin zuena, eta bi urte geroago Ricardo Sanz Cebrianek eta Adolfo Saiz Cocak egindakoa; horretaz aparte, bideragarritasun azterketa egin du Bilbaok, Galdakaoko 2011, 2012 eta 2013. urteetako aurrekontuak oinarritzat hartuta.

Hori izan da, hain zuzen ere, azterketa egiteko oztopo nagusia. Bilbaok salatu duenez, Galdakaoko Udalak ez dizkie beharrezko zituzten datuak eman, behin eta berriro eskatu dituzten arren. Oztopo hori gainditzeko, aurrekontuen simulazioa egin behar izan dute, desanexioaren osteko egoerara ahalik eta zorrotzen hurbiltzen saiatzeko.

Sarrerak eta gastuak

Sarreren arloan, estimazio bat egin du Bilbaok, biztanle, lurralde eta etxebizitza kopuruaren arabera Usansolok Galdakaon duen pisua kontuan hartuta. Sarrera horiek gastuekin alderatu ahal izateko, Lemoako Udalaren aurrekontuetako gastuak hartu dituzte aintzat. Elkarrengandik gertu egoteaz gain, Lemoak eta Usansolok antzekotasun handiak dituzte biztanle kopuru, zerbitzu eta beharrei dagokienez.

Azterketaren arabera, 2011n gastuak sarrerak baino handiagoak izan ziren Lemoan, baina hala gertatu zen urte hartan udalak ezohiko gastu batzuk egin zituelako. Beste bi urteetan, berriz, superabita ageri da balantzean: 1.300.000 bat eurokoa 2012an, eta milioi bat euro ingurukoa 2013an.

Datu horietan oinarrituta, desanexio prozesuaren alde egin du Bilbaok. «Bideragarritasun ekonomikoak ematen duen bermeaz gain, bere etorkizuna erabakitzeko eskubide osoa du Usansolok», esan du.

Txikirako joera

Saioa Elejabarrieta Lemoako alkatea ere egon da ikerketaren aurkezpenean. Esan duenez, globalizazioaren testuinguruan «handira jotzeko joera» nagusitzen den arren, badago txikitasuna hobesten duenik ere, eta Bizkaiko udal gehienek, 79k, 5.000 biztanle baino gutxiago dituztela gogoratu ondoren, udalerri txikien abantailak goraipatu ditu, hautetsien gertutasuna edo kexak helarazteko erraztasuna, esaterako. «Udal bat porrotera eraman dezakeena ez da bere tamaina, kudeaketa desegokia baizik», gaineratu du.

Juan Landak, azken lau urtean Usansoloren desanexioaren arlo juridikoa jorratu duen abokatuak, urriaren 23an egingo duten galdeketa hartu du hizpide. Galdeketa «erabat legezkoa» dela eta inork helegiterik aurkezteko ezelako aukerarik ez dela baieztatu du. Ekinbidearen garrantzia ere nabarmendu du: «Aldundian nagusi diren alderdien jarrera aldaketa erabakigarria suerta daiteke, baina hala izan dadin bozkatu egin behar da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Emakume bat maskararekin paseatzen, Donostian. ©GORKA RUBIO/FOKU

COVID-19arekin hildakoak eta positibo eman dutenak gutxituz doaz etengabe

Jone Arruabarrena

Astetik astera, nabarmen jaisten ari dira kopuruak; oraingoan, 31 hildako izan dira, eta 1.881 positibo.

Aragoiko kanala. ©Javier Cebollada / EFE

Hilik aurkitu dute atzotik desagertuta zegoen Ribaforadako bizilaguna

Berria

Zaragozako Novallas (Aragoi) herrian aurkitu dute 82 urteko gizonaren gorpua.

Tuterako Santanak, artxiboko argazkian. ©TUTERAKO UDALA

Hil egin da Tuterako entzierro batean larri zauritutako gizona

Berria

74 urte zituen, eta uztailaren 26ko entzierroan zauritu zen.

BU-520 errepideko 2. kilometroa, Burgos ©Google Maps

Hiru gazte hil dira asteburuan trafiko istripuz

Lide Egizala Urteaga

Barakaldoko 20 urteko bi gazte hil ziren larunbat gauean. Igandean, berriz, Astigarragako gazte bat hil zen Pirinioetan, moto istripu batean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...