Albistea entzun

Fidel Castroren heriotza. Agur ekitaldiak

Mundu baten irudia, Habanan

Mendebaldeko herri gehienek bidali dituzte ordezkariak Fidel Castroren agur ekitaldira, baina ez lehen lerrokoak. Latinoamerikako ordezkaritza zabala izan da; Maduro eta Morales, besteak beste

Amagoia Mujika Tolaretxipi -

2016ko azaroak 30

Mundua Kubara begira dago, baina munduaren zati bat falta da han. Aipatzekoa da Mendebaldeak izan duen jokaera: kortesiari huts egin gabe, ordezkariak bidali dituzte herri gehienetatik, Fidel Castrori azken agurra emateko, baina ez lehen lerrokoak. Han egon nahi du Europak, Karibeko herrialdearekin harremanak hobetzen ari den seinale —abenduaren 12an sinatuko dute EBk eta Kubak akordio berria—, baina Castroren «giza eskubideen urraketa» jarri dute gobernuburu gehienek aitzakiatzat. Atzo, esanguratsua zen Habanara EBko gobernuburu bakarra joan izana: Alexis Tsipras Greziako lehen ministroa.

Erdialdeko Amerikako eta Hego Amerikako ordezkaritza zabala izan da, berriz. Eskualdean Fidel Castro bidelagun eta inspirazio iturri izan duten guztiak hantxe izan dira: Nicolas Maduro Venezuelako presidentea, Evo Morales Boliviakoa, Rafael Correa Ekuadorkoa eta Daniel Ortega Nikaraguakoa —Enrique Peña Nieto Mexikokoa ere han izan da—. Venezuelan Hugo Chavez hil zeneko antzeko irudia eman du Habanak: XX. mendeko bigarren aldian suspertu eta itzaltzear den munduaren dolu eta mina. Etsipenik ez da ageri, baina, Maduroren eta gainerakoen hizketan. «Gure herrien XX. mendeko askatzailea izan da, eta XXI. menderako proiekzioa eman digu».

Afrikatik ere ordezkaritza zabala heldu da, Kubarekin izandako harreman onaren ondorio, batez ere Europako deskolonizazio garaian. Hego Afrikako Jacob Zuma, Zimbabweko Robert Mugabe edota Ekuatore Gineako Teodoro Obiang, besteren artean.

AEBak Ben Rhodes segurtasun nazionaleko aholkulari ondokoak ordezkatu ditu. Barack Obama jarduneko presidenteak dolumina azaldu du «historiak bere lekuan jarriko» duela esanez. Donald Trump presidente hautatua, berriz, Miamiko anticastristen euforiak elikatuta dabil. Mehatxu egin du bertan behera utziko duela Obamak Raul Castro Kubako presidentearekin egindako akordioa, «hitzarmen hobea» egiten ez badute.

Errusiako presidente Vladimir Putinek ere nahiago izan du ordezkaria bidali, Trumpekin duen harremana ez kaltetzeko. Baina ez dator bat Trumpek mandatariaz dioenarekin, Putinentzat «Errusiaren benetako laguna» izan baita Castro, eta «etsenplua» herri askorentzat. Txinaren izenean, berriz, Li Yuanchao presidenteordea joan da «Txinako herriaren dolumin sentituenak» adieraztera. «Iraultzaile handia eta Txinaren lagun handia» izan dela nabarmendu du.

Mundu baten argazkia eman du atzokoak. Gaurkoak beste bat emango du, Kuba barrualdeko herritarrena. Komandantearen errautsak daramatzan Askatasunaren Karabana abiatuko baita Santiagoraino.

Otegiri, debekua

Joan nahi, baina utzi ez diotenik ere izan da. Arnaldo Otegi Sortuko idazkari nagusiari ez diote utzi Miarritzen hegazkinera igotzen, debekatua duelako AEBetako aire eremuan sartzea.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Macron eta Putin prentsaren aurrean, joan den otsailaren 7an Moskun egindako bileraren ondoren. ©EFE

Macronek eskatu du Errusiaren segurtasun bermeak aintzat hartzeko

Igor Susaeta

Frantziako presidenteak elkarrizketa batean adierazi duenez, Putinek gerraren amaiera negoziatzea onartzen baldin badu, aintzat hartu behar da NATO «bere ateetaraino heltzeko duen beldurra»
Karakalpakstango 22 ekintzaileren kontrako epaiketaren hasiera, joan den astelehenean, Uzbekistango Bukhara hirian. ©BERRIA

Karakalpakstango protesten epaiketa hasi du Uzbekistanek

Gorka Berasategi Otamendi

Hogei urte arteko zigorrak eskatu dituzte 22 auzipetuen kontra. Manifestariek salatu zuten presidenteak eskualde autonomoaren subiranotasuna ezabatu nahi zuela konstituzio erreforma batekin
Macron eta Putin, joan den otsailaren 7an, Moskun. ©EFE

Macronek eskatu du Errusiaren segurtasun bermeak aintzat hartzeko

Igor Susaeta

Frantziako presidentearen arabera, Putinek gerraren amaiera negoziatzea onartzen badu aintzat hartu behar da NATO «bere ateetaraino heltzeko duen beldurra»

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...