Albistea entzun

Canal+ek euskarazko azpidatziekin estreinatuko ditu filmak abendutik

Jaurlaritzarekin elkarlanean, 247 filmetik gora eta 24 telesail euskaratuko dituzte 2016ra bitartean
Canal +eko Alex Martinez, atzo, Jaurlaritzako Uriarte sailburuarekin eta Baztarrika sailburuordearekin.
Canal +eko Alex Martinez, atzo, Jaurlaritzako Uriarte sailburuarekin eta Baztarrika sailburuordearekin. GORKA RUBIO / ARP

Edu Lartzanguren -

2014ko azaroak 18 - Donostia

«Edozein hizkuntzak fikziozko edukiak behar ditu, erreala izatekotan», esan zuen atzo Patxi Baztarrika Eusko Jaurlaritzako Hizkuntza Politikarako sailburuordeak. Gasteizko gobernuak Canal+ katearekin sinaturiko ituna aurkeztu zuen Donostian. Horren bitartez, kateak aurrerantzean estreinatuko dituen film gehienak euskarazko azpidatziekin emango dituzte. Filmak zinema aretoetan eman eta lau hilabetera ematen dituzte Canal+ katean. Aretoetan arrakasta handiena lortu dutenak euskaratuko dituzte. Abenduan hasiko dira azpidatziak zabaltzen. Denera, 2016. urtera arte, 247 filmetik gora euskaratuko dituzte, eta nazioartean arrakasta handia lortutako 24 telesail.

Prentsa aurrean agertu ziren Cristina Uriarte Hezkuntza, Hizkuntza Politika eta Kultura sailburua, Baztarrika bera eta Alex Martinez Roig Canal+eko edukien zuzendari nagusia. Uriartek gogoratu zuen Euskararen Legeak herritarrei eskubidea ematen diela informazioa euskaraz jasotzeko: «Euskara aterako da garaile».

Hiru urterako egin dute hitzarmena, ikusleek denbora behar dutelako euskarazko azpidatziak erabiltzen ohitzeko, Baztarrikak esan zuenez. Euskaraturiko filmen kalitatea eta kantitatea nabarmendu zuten itunaren sinatzaileek. Izan ere, Canal+ek estreinatuko dituen filmen %60 azpidatziko dituzte euskaraz, betiere zinema aretoetan jasotako diruaren %90 irabazi dutenak. Aurten, 47 filmen eta bi telesailen azpidatziak egin eta emango dituzte. Datorren urtean, gutxienez ehun film eta 11 telesail azpidatziko dituzte, eta 2016an, beste horrenbeste. «Itun hau oso ona da euskararentzat eta euskal herritarrentzat, euskaraz gozatzeko aukera emango dielako», esan zuen Baztarrikak.

Ituna gauzatzeko aurrekontua 369.332 eurokoa da, eta, horretako, 200.000 inguru Jaurlaritzak jarriko du; gainerakoa, Canal+ek. Gobernua izango da azpidatzien jabe. Urtebetez, telebista kateak bakarrik erabili ahalko ditu azpidatzi horiek. Urtebete pasatuta, Jaurlaritzak eskuragarri jarriko ditu, Baztarrikak atzo esan zuenez. Halere, ez zuen argitu zein lizentziarekin eskainiko dituzten. «Ez dago merkataritza helbururik», adierazi zuen.

Canal+ «eredugarria» izan dela nabarmendu zuen sailburuordeak, eta «beste telebisten jarrera agerian uzten» duela iritzi zion. Baztarrikak salatu zuen Espainiako Konstituzioak hizkuntza eskubideen inguruan dioena «fikzioa» izan dela 36 urteotan. Telebistek doan izango dituzte azpidatziak, Canal+en urtebeteko epea bukatu ondoren. Canal+en bidea hartu beharko luketela adierazi zuen: «Inork ez dio uko egiten doan eskain dezakeenari».

Itunak «normaltasuna»ekarriko duela nabarmendu zuen Canal+eko ordezkariak. Gazteen artean ohiturak aldatu direla adierazi zuen: «Pirateriarekin, gazteak ohitu egin dira telesailak jatorriko hizkuntzan eta azpidatziekin ikusten». Euskarazko azpidatziak beti egongo dira eskura, ikuslea Euskal Herritik kanpo egonda ere. Baita Smart TV, Yombi eta beste plataforma guztietan ere.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Nagore Legarreta

«Sagardoaren prezioa igotzea erabaki behar izan du sektoreak»

Miren Garate - Gipuzkoako Hitza

Mitxelenak esan du sagardotegi garai "berezia" datorrela aurten; izan ere, lehen asteetan, behintzat, ezingo da zutik kontsumitu. Mahaira ekarriko dute sagardoa, pitxerretan edo botila gardenetan, iaz bezala.

Bizikleta zuri bat jarri dute istripua gertatu zen toki berean. ©URTZI URKIZU

Behar ez zuen ezbeharra

Urtzi Urkizu

Mila txirrindularik baino gehiagok Jon Rodriguez omendu dute: aurreko asteburuan hil zen, errepidean. Bizikleta zuri bat jarri dute istripua izan zen tokian, Gaintxurizketan, Irunen.

1 ©GORKA RUBIO / ARGAZKI PRESS

«Arrano Etxearen historia amaitu egin da»

Enekoitz Telleria Sarriegi

«Bizi proiektu bat» animalien zaintzari emana. Horixe da Albisu eta Garcia senar-emazteek Igeldoko euren etxean sortu eta jorratu dutena: teilatupea eta babesa. Aitortza nahikorik gabeko boluntario lana.
<em>Sin huellas</em> telesailaren grabaketak. Hori izango da euskarara bikoiztu edo azpidatziko duten lanetako bat. ©AMAZON PRIME

Espainiako Amazonek fikzio berriak euskaratuko ditu

Urtzi Urkizu

Ordainpeko plataformak iragarri du lan berriek euskarazko, katalanezko eta galegozko bikoizketak edo azpidatziak izango dituztela

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.