Albistea entzun

Txirrindularitza. Euskal Herriko Itzulia: 5. etaparen kronika

Tantaka erori da birusa

Mikel Landak irabazi du bosgarren etapa, eguneko ihesaldian sartu eta Aiako aldapan erasoa jota.

Gaur bukatuko da itzulia, 18,3 kilometroko erlojupekoarekin
Mikel Landa Astana taldeko txirrindulari murgiarra, eskuak luze-luze zabalduta, Aiako helmugara iristen.
Mikel Landa Astana taldeko txirrindulari murgiarra, eskuak luze-luze zabalduta, Aiako helmugara iristen. JAVIER ETXEZARRETA / EFE

Unai Zubeldia -

2015eko apirilak 11 - Aia

«Gaizki». Hitz bakarrean. Arrunta zen galdera: «Zer moduz hasi da denboraldia, Mikel?». Ahotsak eman zuen epaia, telefonoaren beste aldean. Entzun ere ez zen egiten ia-ia hilabete atzera. «Zitomegalobirus batek erasan ninduen azaroan, eta bizpahiru hilabete galdu ditut», aitortu zion BERRIAri. Txirrindulari batentzat ez dago bizikleta gainean sufritu ezina baino gaitz larriagorik. Atzo ere, Aiako helmugan, ia entzun ere ez zen egiten Mikel Landaren ahotsa (Astana). Bustita zeuzkan ahots hariak. «Neguan nola ibili nintzen jakinda, are bereziagoa izan da garaipena». World Tourreko lehenengoa. Astana kinka larrian dagoenean lortu duena.

«Jende asko daukat gogoan momentu honetan». Arabarra larri ibili zen eskaintzak egiteko garaian. «Baina familiari eta lagun askori eskaini nahi diet hau». Familiari, lagunei... eta birusari. Aiako aldapan gora ezinean geratu zen birus malapartatuari. Begietara begiratu eta ezetz esan zion neguan, ahulduko zuela, bai, baina ez zuela mendean hartuko. «Eta hilabete barru lehian hastea espero dut». Martxoaren 7an BERRIAri esandakoa da hori. Negar malkotan, berekin nahikoa denbora igaro duela esan zion atzo murgiarrak birusari.

Hasi eta bukatu, zoragarria izan zen eguna. Etapa garaipena jokoan batetik, eta itzulia bestetik. Landa aurrean, eta Simon Yates (Orica), Sergio Luis Henao (Sky) eta Joaquim Rodriguez (Katuxa) atzean. Borroka nagusiak izan ziren horiek, irabazle nagusietako lau, Landaren iheskideen eta Nairo Quintanaren (Movistar) kaltetan. Baina izan ziren borroka txikiagoak ere.

Caja Ruralena, esaterako. «Ezinbestean». Amets Txurrukak (Caja Rural) bi aukera horiek jarri zituen mahai gainean Eibarren, etapa hasteko minutu gutxi falta zirela, eta, noski, baiezkoa izan zen emaitza. Etapa hastearekin batera, erasoka hasi ziren Caja Ruraleko bi txirrindulari oldarkorrenak, eta 31 laguneko ihesaldian sartu ziren Omar Fraile eta Txurruka bera. Tartean ziren Igor Anton (Movistar) eta Landa bera ere. Itziar gainerako bidean, minutu eta erdiko aldea hartuta zeukan ihesaldiak, eta lau minututik gora ere eraman zuten abantaila kilometro gutxi geroago.

Sky atzean lanean, eta Fraile, pixkanaka, mendiko maillota ziurtatuz. Valerio Agnolik eta Rein Taaramaek (Astana) gogotik lan egin zuten aurrean, Landaren mesedetan, eta ihesaldia hiru minuturen aldearekin iritsi zen Andazarrate gainera. Kilometro gutxi lehenago hartu zuen Katuxak ardura tropel buruan, Skyrekin lehia estuan. Aiatik Oriora jaitsita, lehia ikusgarria izan zen Astana, Movistar, Katuxa eta Skyren artean.

Kwiatkowskiren saialdia

Eta ez alferrik, %20tik gorako batez besteko aldapak zeuzkatelako zain. Aldapa tentetu berritan, Taaramae mugitu zen aurrean, bizikleta gaineko oreka joko zailean. Tim Weellems (Lotto), Tony Martin (Etixx), Landa... Espero bezala, Aiarako lehen igoeran erabat sakabanatu zen taldetxoa. Eta ezuste handia izan zen atzean, urrutitik mugitu zelako Michal Kwiatkowski (Etixx). Lotura lanak eginez, David De la Cruzek eman zion lehen bultzada, eta Tony Martinek bigarrena. Tentsio handia sortu zuen mugimendu horrek atzean.

Bost txirrindulari aurrean, Kwiatkowski eta Tony Martin tartean, eta Movistar buruan zela tropela Etixxekoei minutu erdiko aldea jan nahian. Horrela iritsi ziren azken zortzi kilometroetara, Errota jatetxerako bidean, baina Movistarrek hainbestean baretu zuen egoera, azken zati beldurgarrirako Etixxen saialdia ia ezerezean utzita. Quintanak huts egin zuen, ordea, gero.

Ordurako, Landaren mugimenduarekin Gallopin jokoz kanpo geratuta, etapa garaipena lantzen hasita zegoen Astana aurrean, eta neguko amorru guztiak bide bazterrean uztea erabaki zuen azken aldapa tentean. Atzean, berriz, Yates mugitu zen lehenengo, eta Henao eta Rodriguez gero. Hortxe ito zen Quintana. Erantzun ezinik, hamabi segundo galdu zituen helmugan.

Taldekideen babesik gabe, bakar lanean bukatuko da gaur Euskal Herriko Itzulia, Aian hasi eta amaituko den 18,3 kilometroko erlojupeko zailarekin. Eta dotorea izan daiteke saioa, erabat estu dagoelako sailkapen nagusia. Denbora berean daude Henao eta Rodriguez, zazpi segundora dago Simon Yates, hamabira Quintana, 22ra Michele Scarponi (Astana) eta Simon Spilak (Katuxa), eta 28ra Ilnur Zakarin (Katuxa) eta Ion Izagirre (Movistar). Atzoko etapako azken 18,3 kilometroak egin beharko dituzte gaurko erlojupekoan. Timo Roosen (Lotto-Jumbo) izango da abiatzen lehenengoa, 14:30ean, eta Henao azkena, 16:44an.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Adnan Januzaj eta Alexander Sorloth, elkar besarkatzen, Realeko atzoko bi golegileak, Anoetan. ©JON URBE / FOKU

Nagusitasunez irabazita egin du aurrera

Jon Ander De la Hoz

Realak Atletico Madrili irabazi dio, eta Espainiako Kopako final-laurdenetan ariko da. Txuri-urdinek neurketa osoa jokatu dute, eta arazorik gabe lortu dute gailentzea

Iñaki Williams eta Iker Muniain Athleticeko jokalariak. ©Julio Muñoz / EFE

Athleticek Kopan sendatu nahi du Superkopako zauria

Ainara Arratibel Gascon

Zuri-gorriek final-zortzirenetako kanporaketa jokatuko dute gaur, Bartzelonaren kontra. Marcelinok aldaketak iragarri ditu hamaikakoan

Budimir eta Moncayola Osasunako jokalariak, burumakur, atzo, Celtaren aurkako partidan, Balaidosen. ©SALVADOR SAS / EFE

Zalantzati segitzen du oraindik

Eñaut Agirrebengoa

Osasuna bigunegi aritu da Celtaren zelaian, eta esku hutsik gelditu. Ongi ekin dio lehiari, baina ez da gai izan Mallo eta Minaren golei erantzuteko

Fausto Mota kopilotua, eskuinean, haren taldekide Rui Oliveirarekin, Dakar rallyan. ©FAUSTO MOTA

«Orientazio sena izan behar du kopilotuak»

Mikel O. Iribar

Mota kopilotu gisa aritu da lehendabizikoz Dakar rallyan, aurretik motoetan sei alditan parte hartu eta gero. Hamaseigarren amaitu du, haren taldekidearekin batera, T4 kategorian. «Asko gozatu dut», aitortu du.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.