Albistea entzun

Jasone Agirre. EH Bildu koalizioko legebiltzarkidea

«Eragile askok dute zer esana EITB aldatzeko»

'EITB 2022. Eredu berriaren oinarriak' agiria aurkeztu du asteon EH Bilduk, eta beste talde politikoei bidali die. Agirrek esan du egungo egoerara egokitu behar dela EITBren lege berria.
LUIS JAUREGIALTZO / ARGAZKI PRESS

Urtzi Urkizu -

2017ko urtarrilak 15

1991tik 2016ra ETBn kazetari lanetan aritu ostean, EH Bilduko legebiltzarkide taldean ari da orain Jasone Agirre (Abadiño, Bizkaia, 1968). «Aldaketa handia da, eta beste mundu bat ezagutzen ari naiz». Aitortu du «gogorra» egiten ari zaiola, baina, era berean, «aberasgarria» ere bai.

Aurkeztu duzuen proposamenean, EITB «kalitatezkoa, euskalduna eta independentea» nahi duzuela diozue. Gaur egun ez al da horrelakoa?

Kalitatean aurrerapausoak eman behar dira. ETB1 euskalduna da, baina zenbat aurrekontu ematen zaio? Eta Euskadi Irratiari? Nahikoa al da horrekin? Eta kale gehien independente ez izatean egiten du. Gauza bat da telebista publikoa, eta bestea alderdikoia izatea. Pausoak behar dira.

Esan duzue unean uneko gobernuetatik independentea izateak EITBri prestigioa emango diola. Zer behar da horretarako?

Egun ardura postu guztiak atzamarrez erabakitzen dira, konfiantzako postuak dira. Ez dago karrera profesionalik. Botere gune guztiak konfiantzakoak dira. Irizpidea izan behar dute profesionalaren gaitasunak eta merituak, eta, batez ere, aukera berdintasuna bermatu behar da.

Ikus-entzunezko kontseilu bat beharrezkoa ikusten al duzue?

Bai. Organo bat behar da, norabide bat markatuko duena.

Ikus-entzunezko lege berriak nolakoa izan beharko luke?

Egungo legea 1982koa da, orduko parametroetan egina. Mapa soziolinguistikoa asko aldatu da. Legeak egungo egoerara egokituta egon behar du. Eta ahalbidetu behar du EITB kalitatezkoa, euskalduna eta independentea izatea.

Informazio agentzia publikoa sortzeko eskatu duzue.

Komunikabideek sarri menpekotasun handia dute informazio agentzietatik datozen albisteetatik. Agentzia kokatuta dagoen tokiak baldintzatu egiten du. EITB hurbila izatea nahi badugu, norbere agentzia publikoa izatea garrantzitsua iruditzen zaigu.

Proposatu duzue aurrekontuetan ETB1ek lehentasuna izatea, eta euskara sartzea ETB2n eta Radio Euskadin. Beste taldeak ados egon al daitezke?

Jakin nahiko nuke hori. Interesgarria da PSE-EEk aurkeztu zuen txostena [2015ean]. Eurek onartzen dute egoera soziolinguistikoa aldatu dela, eta EITB horretara egokitu behar dela. Mapa aldatu behar bada, zergatik ez da aldatzen programazioa horren arabera? Ez dakit zergatik ez den ETB2n euskara gehiago sartzen. Herritarrek modu naturalean hartuko lukete.

EAJk EITBren eredutik koma bat aldatu nahi ez badu, zer gerta daiteke?

Gure borondatea eta konpromisoa da EITBren eredua aldatzea. PSE-EEk positibotzat jo badu gure proposamena eta Elkarrekin Podemos ere hitz egiteko prest badago, konbentzituko dugu EAJ. Gainera, alderdi politikook erantzukizuna daukagu, baina eztabaidak ez du horretara mugatu behar. Eragile askok dute zer esana EITB aldatzeko. Alderdiekin ez ezik, kaleko jendearekin eta eragileekin ere lortu behar ditugu akordioak.

Nafarroako eta Ipar Euskal Herriko eragileek ere parte hartu beharko lukete?

Bai, hala uste dut. Eta EITBren emisioak modu naturalean heldu beharko lirateke toki horietara.

1999an, Andoni Ortuzar izendatu zuten EITBko zuzendari nagusi, EAJren, EAren eta Euskal Herritarrok alderen botoekin. Ortuzarrek oso gutxi zekien euskaraz. Zer ezaugarri izan beharko lituzke EITBko zuzendari berriak?

Zuzendariak konpromisoa izan behar du aipatzen ari garen berregiturarekin. Eta euskalduna izan beharko luke.

EITBren aurrekontuen ehuneko handi bat lantaldearen pertsonal gastuak hartzen du. Aldaketak egin beharko lirateke?

Lantalde estrukturala zein den aztertu eta erabaki behar da, zenbat jende behar den egunero antenara irteteko eta kalitatezko irrati-telebista bat egiteko. Horren araberakoa izan beharko luke aurrekontuak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Andoni Aldekoa EITBko zuzendari nagusia ©Aritz Loiola / Foku

EITBren 'streaming' plataformari 'Primeran' izena jarriko diote

Urtzi Urkizu

Andoni Aldekoa EITBko zuzendari nagusiak taldearen asmoen eta lehentasunen berri eman du gaur, Bilbon, Seriesland websailen jaialdian. «Kontsumo eta euskarri digital berrien aurrean, euskarazko edukiak bermatu behar ditugu», esan du

 ©OSKAR MATXIN EDESA / FOKU

«Kritika egingo dugu, tokikotik globalera»

Urtzi Urkizu

Bilboko Seriesland jaialdian 'Zikings' animaziozko websailaren lehen atala proiektatu dute. Abenduan sarean izango dira ikusgai aurreneko bost atalak. Proiektua «monetizatu» egin nahiko lukete.
 ©ARITZ LOIOLA / @FOKU

«Musikan dena dut egiteko»

Gorka Erostarbe Leunda

Pandemiak apenas utzi dion 'Rueda' azken lana behar bezala aurkezten; Bilboko Euskeria abesbatzaz lagunduta kontzertua emango du etzi, Donostiako Viktoria Eugenia antzokian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.