Albistea entzun

Markel Gajate. 'Go!azen'-eko aktorea

«Kantuan dantzatzen baino hobeto moldatzen naiz»

ETB1ek 'Go!azen' telesailaren laugarren atala emango du gaur, 21:00etan. Mikelen rola jokatzen du Gajatek, eta Esne Beltzaren 'Gogoak' kanta abestuko du gaurko atalean.
ETB / ETB Tamaina handiagoan ikusi

Urtzi Urkizu -

2016ko abenduak 9

Aktorea izateaz gain, modelo lanetan ere aritzen da Markel Gajate (Donostia, 1996). Enpresa zientzien nazioarteko ikasketen hirugarren ikasturtean dabil, halaber.

Harrera beroa izaten ari da Go!azen. Gero eta ikusle datu hobeak ditu, ezta?

Bai, lehen atalak %2,5eko ikusle kuota izan zuen, eta igoz joan gara. Bigarrenak %3ko kuota izan zuen, eta joan den astekoak %4,5ekoa.

Zu zer moduz sentitzen zara arrakastarekin?

Ondo. Oinak lurrean izan behar ditugu. Ez dugu hartu behar besteak baino gehiago bagina bezala. Jendea hurbiltzen da argazkiak eskatzera, eta pozik gaude.

10-11 urte zenituen Balbemendi telesailean aritu zinenean, Jabier Elortegiren zuzendaritzapean. Orain berriz Elortegirekin aritzeak gauzak errazten al ditu?

Hautaprobak zeudenik ez nekien, eta Elortegik deitu zidan preseski hautaprobetara aurkezteko. Elortegi nirekin gogoratu zelako nago hemen. Hala ere, hautaproba asko gainditu nituen.

Telesailan aktore gisa, kantuan eta dantzan azaltzen zara. Zer kostatu zaizu gehien?

Aktore lana ez zait hainbeste kostatu. Dantza gehiago kostatu zait. Kantuan dantzatzen baino hobeto moldatzen naiz. Koreografiak landu eta landu, dantzan ikasi dugu azkenerako.

Hilaren 22an Ordizian (Gipuzkoa) Go!azen-en antzezlana estreinatuko duzue. Nondik nora joango da?

Telesailaren ildoari jarraituko diogu, baina sei aktore bakarrik ariko gara. Duela urte dezente aritu nintzen antzerkian, baina ahaztua dut. Konturatu naiz antzerkirako berde samar nagoela, baina gogoz hartu dut. Apirilaren 9ra arte ariko gara, herriz herri.

Iruditzen zaizu 2017an telesailaren atal berriak grabatzeko aukera izango duzuela?

Itxaropena hor dago, ikusita jende askok ikusten duela. Grabaketetan lantalde polita egin genuen, eta oso ondo legoke berriro elkarrekin lan egitea.

Zein dira zure aktore kuttunak?

Euskal Herrian, Ramon Agirre; eta nazioartean, Bryan Cranston Breaking Bad telesaileko protagonista.

Etorkizunean Euskal Herrian lanik ez bada, pentsatu duzu Madrilera-edo joatea?

Bai, aukera hori beti dago mahai gainean. Beti pentsatu dut aukera horretan; horregatik ari naiz gogor unibertsitateko ikasketekin.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©GORKA RUBIO / @FOKU

«Galtzen ari den lan bat azaleratu nahi dut»

Enekoitz Telleria Sarriegi

Ontzi bat da, esamolde bat da, eta arrantzalearen azalean jarri nahi bat da 'Axalian'. Izen hori jarri dio Ortolaizek Zarauzko Photomuseumen paratu duen erakusketari: «Mundu eder bat da itsasoa».
Jon Mirande, eskuinean, Bretainiar Elkartearen Saria ekitaldian, 1969. ©Z / EZEZAGUNA

De viris illustribus: Jon Mirande bretainiarra

Miel A. Elustondo

Euskaraz baino lehen ikasi zuen bretoieraz Jon Mirandek Parisen. Euskaldunak lagun egin baino lehen, bretainiarrak egin zituen adiskide. «Gazte haien karra! Askok ez zekiten haurretatik beren herriaren hizkuntza, baina ikasi zuten eta bretoieraz ari dira beti. Guk, aldiz...», idatzi zuen. Goulven Pennaod bretainiarrarena dugu jakilegoa, Txomin Peillenek 1976an bildua.

 ©MARISOL RAMIREZ / FOKU

«Zorroztasuna funtsezkoa da kazetaritzan»

Urtzi Urkizu

Arabako, Bizkaiko eta Gipuzkoako kazetarien elkargoko dekano eta Euskal Kazetarien Elkarteko presidente izendatu dute Goikoetxea. Dioenez, kazetariek baldintza onak behar dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.