Albistea entzun

EUROPAKO IRRATI-TELEBISTA PUBLIKOAK (V): ESLOVENIA

Gizarte zibilak bere eragina du

Esloveniako irrati-telebistan, Programazio Kontseiluak izendatzen du zuzendaria eta arautzen du programazioa. Kideen %17 baino ez dira alderdi politikoek hautatutakoak.
Esloveniako irrati-telebista publikoaren egoitza nagusiaren sarrera, Ljubljanan.
Esloveniako irrati-telebista publikoaren egoitza nagusiaren sarrera, Ljubljanan. VERONIKA ROT

Urtzi Urkizu -

2017ko martxoak 12

Radiotelevizija Slovenija RTVSLO enpresa publikoa 1928. urtean jarri zuten martxan. Gaur egun, bost telebista kate —hiru nazionalak eta bi lurraldekoak— eta hiru irrati kudeatzen ditu. Programazio Kontseiluak kontrolatzen du taldea, eta kontrol horretan eragin nabarmena dute gizarte zibileko eragileetako ordezkariek. «Gizarte zibilak indar handia du Programazio Kontseiluan, eta kontseilu horrek programazio planak finkatzen ditu». Hala nabarmendu du Suzana Vidas Karolik, Esloveniako irrati-telebista publikoko nazioarteko harremanetako saileko arduradunak.

Programazio Kontseilua 29 kidez osatua dago, eta horietatik hamasei Biltzar Nazionalak aukeratzen ditu, ikusleek eta entzuleek proposatuta. «Hamasei kide horien artean daude unibertsitateko irakasleak, elkarteetako ordezkariak, sindikatuetako eta sindikatu elkarteetako kideak, artearen, kulturaren, zientziaren eta kazetaritzaren arloetako ordezkariak, baita gizarte zibileko beste talde batzuetako kideak ere», zehaztu du Vidas Karolik. «Hautagaien egokitasuna eta aukeraketa deialdi publikoen bidez egiten da. Gainera, eskualde ezberdinetakoak behar dute izan».

Programazio Kontseiluko beste kideen artean, bat hungariar komunitate nazionalak aukeratzen du, beste bat italiar komunitate nazionalak, beste bat Esloveniako Arteen eta Zientzien Akademiak, bi kide erlijio komunitateek proposatzen dituzte, hiru kide RTV Eslovenia taldeko langileek aukeratzen dituzte eta bost kide Biltzar Nazionalak izendatzen ditu alderdi politikoek proposatu eta gero —ordezkaritzaren arabera—. Dena den, kontseilu horretako ordezkarien %17 baino ez dira alderdi politikoek proposatutakoak.

Programazio Kontseiluak izendatzen du irrati-telebistaren zuzendari nagusia, eta irratiko zein telebistako zuzendarien izendapena baimentzen du.

Vidas Karolik azaldu duenez, Gainbegiratze Kontseilu bat dago, 11 kidez osatua. «Horietatik bost parlamentuko alderdi politikoek aukeratzen dituzte, lau gobernuak izendatzen ditu, eta bi irrati-telebistako langileek zuzenean aukeratzen dituzte». Kontseilu horrek erabakitzen ditu finantza planak, eta urteko txostenak egiten ditu. Aipatutako bi kontseiluak aldi berean eratzen dira, eta ordezkarien karguak lau urterako izaten dira.

Kazetarien independentzia RTVko estatutuak bermatzen duela azaldu du Vidas Karolik. «Kazetariek estandar profesionalak eta oinarri etikoak betetzen dituzte saio guztietan». Hizkuntzei dagokienez, esloveniera da programazioan hizkuntza nagusia. «Baina baditugu hainbat saio italieraz eta hungarieraz, bi hizkuntza horiek hitz egiten dituzten komunitateentzat. Raadio Eslovenia International irratia ere badaukagu, kanpoko entzuleentzat». Irrati horrek eslovenieraz, alemanez eta ingelesez emititzen du.

Telebistako eta irratiko eskaintzaz gain, taldeak Interneten zabaltzen dituen edukiak aintzat hartzekoak direla nabarmendu du taldeko nazioarteko buruak: «Interneteko edukiak irratikoak zein telebistakoak bezain garrantzitsutzat jotzen dira». www.rtvslo.si Eslovenian bisita gehien dituen bost webguneen artean dago. «Telebistako eta irratiko programazioa webgunearen bidez ikus daiteke, eta presentzia handia dugu sare sozialetan» —sareen artean, Snapchat erabiltzen dute—.

Irrati publikoak telebistak baino hartzaile datu hobeak ditu. Irratiaren merkatu kuota %24 inguruan dabil, eta telebistarena %21 inguruan. «Telebistan liderrak izaten gara kirolarekin eta politika emankizun garrantzitsuekin. Baina telebistako datuak ez dira handiak, ez dugulako emititzen reality-show-rik eta folletoirik».

Etorkizuneko erronken artean, Ljubljana hiriburuan albiste erredakzio integratua sortzea aipatu du RTVko ordezkariak. «Eskualdeetako zentroetako lan antolaketa ere erronketako bat da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

 ©ANDONI CANELLADA / FOKU

«Medikuak amari esan zion naturaren fenomeno bat nintzela»

Enekoitz Telleria Sarriegi

Legorreta jaioterrian talidomidak kalte egindakoen aldeko lasterketa egin dute berriki, eta Garmendia «oso harro» dago herrikideez. Borrokalari petoa da, eta artista. 'White Lines' telesailean aritu da, aktore.
1 ©BOB EDME / EZEZAGUNA

Biluztasunaren atzetik

Amaia Igartua Aristondo

Uztailetik, zigortuta dago Hendaiako hondartzan nudismoa egitea: Ipar Euskal Herrian, baimendutako guneetan soilik egon daiteke biluzik. Hegoaldean, berriz, edonon, tokiko udalek ez badute nudismoa debekatzeko araurik onartzen.
Olivia Colman eta Josh O'Connor <em>The Crown</em>-eko protagonistak, telesaileko eszena batean. ©BERRIA

'The Crown'-ek lortu du garaikur gehien Emmy sarietan

Olatz Esteban Ezkati

Zazpi sari eskuratu ditu. Komedian, 'Ted Lasso' gailendu da, eta telesail laburrik onena 'The Queen's Gambit' izan da

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.