Oilasko artifizialaren haragia, platerako bidean

Aspaldian hitz egiten ari da haragi artifiziala sortzeko aukeraz, baina teoriatik praktikarako saltoak osasunarekin eta etikarekin lotutako ertz askori izkin egitea eskatzen du. Laborategian sortutako oilasko haragia, berez, badago prest.

1 Izter goxo bat labean, baina oilasko oso bati sekula itsatsirik egon ez dena? Hmmm... jango ote duenik bada? Egongo ez da, ba, eta pagatuta gainera. Kaliforniako (AEB) Memphis Meats enpresak laborategian sortu du oilasko haragia, haragi artifiziala alegia, eta hura merkaturatzeko prozesuan ari da. Ez dira gutxi gainditu beharko dituen oztopoak, baina merkatura iritsiko dela pentsatzen has gaitezke, bai horixe.

2 Zergatik? Aurreko urtean lehen albondiga artifiziala sortu zuten, eta orain, berriz, oilasko eta ahate aharagia. Memplhis Meats star up-aren atzean interes ekonomiko asko dago, eta negozio biribilerako aukera ematen duen aukera horren atzean dauden enpresak ez dira gutxi.

3 Baina nola egiten dute haragia laborategian? In vitro metodoaz sortzen dutela esan daiteke. Konpainiak dio egun kontsumitzen den haragia bezalakoa dela, berdin-berdina; hazteko moduak aldatzen dira. Zelula ama zehatzak hautatzen dituzte haragia sortzeko, baldintza jakin batzuekin. Haragiaren ehuna eta zapore zehatzak lortzeko zelula amak baliatzen dira. Zelula horiek erreproduzitzen hasten dira, haragi puskak nahi den neurria hartu arte. Uraren eta bitaminen bidez garatzen da haragia. Lau-sei astetan haragiak kontsumorako neurria hartzen duela azaldu du Memphis Meats konpainiak.

4 Zergatik oilaskoa? Behiaren edota ardiaren okela sortzea baino errazagoa delako teknikoki, baina interes handiagoa duelako ekonomikoki ere. AEBetan 40 kilo oilasko haragi jaten du hango biztanle bakoitzak urtero. 86.300 milioi euroren salmentak dituen merkatua da.

5 Eta ahatea? Txinak biztanle asko dituelako, noski. Ahatearen haragia da gehien kontsumitzen dena han. Urtero, 3.000 milioi kilo ahate okel kontsumitzen dituzte txinatarrek, gainontzeko mundu osoak kontsumitzen duena baino gehiago. Negozioa bistan da.

6 Osasuntsua ote da artifizialki sortutako haragia? Liburu osoak idazteko ematen du galdera horrek, baina Memphis Meatseko arduradunak oso argi dauka: «Hazi ez diren animalien haragia aurkeztea historikoa da; okela garbia da, ingurumenari kalterik egiten ez diona, gizakien ongizatea laguntzen duena, eta animaliak hil beharrik eskatzen ez duena. Okela mota hau masiboki ekoitzi nahi dugu, izugarri ona eta iraunkorra delako».

7 Noiz merkaturatu nahi dute? 2021. urterako salgai jarri nahi du konpainiak. Ganaduaren sektorera izugarrizko aldaketa ekar dezake haragi horrek, osasun publikoaren aginteen baimena lortzen badu. Gaur egun, ekoizpena garestiegia da: kilo erdi okel ekoizteak 8.400 euroko kostua dauka. Konpainiak dio lau euro ingurura jaits daitekeela.