Webgune honek cookie-ak erabiltzen ditu zure nabigazioa errazteko, publizitatea erakusteko eta analisi estatistikoak egiteko. Nabigatzen jarraitzen baduzu, hauen erabilera onartzen duzula ulertuko dugu. Informazio gehiago nahi baduzu, kontsultatu Cookie Politika

X

Berria.eus

Gizartea Kartzelara bidali dute Ana Belen Jimenezen senarra

Publizitatea

Gizartea

EMAKUMEEN AURKAKO INDARKERIA

Kartzelara bidali dute Ana Belen Jimenezen senarra

Gasteizko epaileak hartu du erabakia. Burgosen azaldu zen hilotza, baina, ikerketaren arabera, emakumea Araban hil zuen bikotekideak.
Atzo elkarretaratzea egin zuten Lantaronen, hilketa salatzeko. /
Atzo elkarretaratzea egin zuten Lantaronen, hilketa salatzeko. / Juanan Ruiz, Argazki Press

2017-10-06 / Garikoitz Goikoetxea

Ana Belen Jimenez hiltzea egotzita atxilo hartuta dago haren senarra; gaur hartu dio deklarazioa epaileak, eta espetxera bidali du. Espainiako polizia iturrien arabera, aitortu egin du Lantarongo etxean (Araba) hil zuela emaztea, eta handik eraman zuela autoan Miranda Ebrora (Burgos, Espainia). Han ikusi zuen emakume batek gorpua ibilgailuaren barruan. Horregatik, Miranda Ebroko Auzitegitik Gasteizkora pasatu dute auzia.

Clara Campoamor elkarteak auzian parte hartzeko asmoa du, akusazio partikular modura. Berrazter daitekeen bizi osorako espetxe zigorra eskatuko du, baita seme-alaben gaineko guraso agintea kentzeko eta haiekin hartu-emanak izatea debekatzeko ere. Era berean, nabarmendu dute gogor borrokatuko direla epaileak ez dezan krimena aitortu izana aintzat hartu zigorraren aringarri gisa.

Lantaronen "gogor" gaitzetsi zuten hileta atzo; herritarrekin batera, hainbat erakundetako ordezkariak bildu ziren protestara. Udalak adierazpen instituzional bat onartu du: "pertsonen arteko errespetua eta berdintasuna barneratzeko eta gogoeta egiteko" eskatu diote gizarteari. Ohartarazi dute halako hilketak gertatzen diren bitartean ez dagoela gizon eta emakumeen arteko benetako berdintasunik. Emakumeen Mundu Martxak deituta, protestak egin zituzten beste herri batzuetan ere.

Gasteizko Mercedesen lantegian ere egin dute protesta gaur; hango langilea zen Jimenezen bikotekidea, hilketa egotzita kartzelara sartu duten gizona. Hain zuzen ere, ikerketaren arabera, Jimenez etxean hil ondoren, Miranda Ebrora joan zen, eta han utzi zuen gorpua. Gasteizera joan zen ondoren, lantokira. Han atzeman zuten.

Publizitatea

Sortu kontua
Garikoitz Goikoetxea

Publizitatea

Gaiarekin zerikusia duten albisteak