ESKOZIA

Nicola Sturgeonek lehen ministro karguaren zina egin du

Asteburuan SNPko buruzagitza ere bere gain hartu du, bi karguetan Alex Salmond ordezkatuz.

Nicola Sturgeon, Alex Salmondekin. /
Nicola Sturgeon, Alex Salmondekin. / Robert Perry/EFE

Berria -

2014ko azaroak 20

Irailaren 19an iragarri zuen Salmondek SNPko buruzagitza eta Eskoziako lehen ministro kargua utziko zuela, irailaren 18an Eskoziaren independentziari buruzko erreferendumean unionismoa nagusitu ostean. Alderdi nagusian asteburuan ordezkatu du Sturgeonek, eta gaur zina egin dio lehen ministro karguari. Eskoziako Parlamentuak atzo izendatu zuen lehen ministro.

Parlamentuan, bozketa aurreko hitzartean, Sturgeonek nabarmendu zuen erreferendumeko parte hartzeak (%85) erakusten duela demokrazia "inoiz ez bezala loratu" dela Eskozian, eta agindu zuen parlamentari guztiekin lan egingo duela gizarte "hobea eta bidezkoagoa" egiteko: "Eskoziar demokraziaren aro berri bat dugu aurrean. Guk guztiok hutsik ez egiteko ardura dugu".

"Egun onenak etortzeko daude oraindik Eskozian"

Independentziari buruzko erreferendumean ezezkoa nagusi irten arren, alderdi independentista inoiz baino indartsuago dago. Bi hilabete eskasean 60.000 bazkide berri lortu ditu SNPk, eta irailean zeuzkanak halako lau ditu orain. Alderdiko buru izendatu berritan, lehenbiziko helburua datorren urteko udaberrian jarri zuen asteburuan Sturgeonek: Erresuma Batuko hauteskundeetan. "Liberal-demokratak eta UKIP [Erresuma Batuaren Independentziaren Alderdia] batuta baino kide gehiago ditugu. Hauteskundeotan, SNP ikusteko modukoa izango da, eta entzun egingo dute Eskoziaren ahotsa. Westminsterrek ez gaitu betiko egoerara itzularaziko".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna