"EAJk eta PSEek onartuko dituzten aurrekontuak bidegabeak eta elkartasun gabekoak dira”, adierazi du Igor Mera ESK sindikatuko kideak gaur goizean Legebiltzarraren aurrean egindako elkarretaratzean. Haren aburuz, barne produktu gordina kontuan izanda, Eusko Jaurlaritzak Espainiako Gobernuak baino gutxiago gastatuko du hezkuntza publikoan. Horrez gain, Urkulluren gobernuak Patxi Lopezek gizarte zerbitzuetan egindako murrizketak mantenduko dituela salatu dute.
Era berean, Araba, Bizkaia eta Gipuzkoako politika fiskala salatu du Endika Rodriguez EILASeko kideak: “Europarekin alderatuz gero, EAEn 6.000 milioi euroko defizit fiskala dago”. Horrekin batera, Jaurlaritzak bestelako lehentasunak izan beharko lituzkeela uste du Rodriguezek: “Gizarte zerbitzuak garatzeko edo ekonomia bultzatzeko instituzioak zorpetzea ez dugu gaizki ikusten. Baina arazoa da zor publikoa Abiadura Handiko Trenaren moduko lanengatik sortzen denean”.
CCOOek ere elkarretaratzea egin du legebiltzarraren aurrean. Unai Sordo CCOO sindikatuko idazkari nagusiak Urkulluri eskatu dizkio politika fiskal “oldarkorragoa” eta babes sozialerako politika “eraginkorragoak”.