EUSKAL PRESOAK

Parisko auzitegiak Frederic Haranbururen askatasun eskaera baztertu du

Bagoaz-ek jakinarazi duenez, Diziplina Anitzeko Komisioak argudiatu du Haranburuk bere engaiamendu politikoarekin jarraitzen duela. ETA jardun armatura itzuliko balitz presoa jardun horretara batuko litzatekeela ere uste du batzordeak. 25 urte deramatza preso.

Otsailean aztertu zuten Frederic Haranburu baldintzapean askatzeko eskaera. Irudian, protesta bat.
Otsailean aztertu zuten Frederic Haranburu baldintzapean askatzeko eskaera. Irudian, protesta bat. / Bob Edme

Berria -

2015eko martxoak 27

Bagoaz elkarteak salatu duenez, horrek "argiki" erakusten du "nolako mespretxuarekin jokatzen duten Euskal Herriaren egoera politikoa". Gogorarazi dute Ion Kepa Parotek pausatutako eskaerei lau aldiz ezetza erantzun diotela, "jakinez jada hamar urte kanpoan egoten ahal dela".

Deliberoa "kezkagarritzat" eta "eskandalutzat" jo du Bagoaz-ek, eta protestara deitu du. Apirilaren 4rako antolatu dute ekitaldi bat, 17:00etan, Larreko kultur zentroan, Senperen.

Otsailaren 18an egin zuten Frederic Haranburu Xistor-en baldintzapeko askatasuna eskatzeko auzia, Parisen. 1990eko apirilean atxilotu zuten Haranburu, eta geroztik preso dute Frantzian. Egun, Lannemezango espetxean dago. Baldintzapean aske uzteko eskaera 2013ko uztailean egin zuen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna