Uxue Barkos Nafarroako presidente

Barkos, lehen presidente abertzalea

Izendapenaren kontra UPNk eta PPNk hamazazpi boto elkartu dituzte. PSN abstenitu egin da, bere zazpi botoekin. Nafarroako zortzigarren presidentea da.

Jon Ordoñez Garmendia -

2015eko uztailak 21

Urduri, emozionaturik ia eman du Ainhoa Aznarez Nafarroako Parlamentuko presidenteak Uxue Barkos Nafarroako presidente hautatzeko bozketaren berri. Lehenik, Maiorga Ramirez Parlamentuko lehen idazkariak irakurri du bozketaren emaitza: Barkosen alde bozkatu dute Geroa Bai, EH Bildu, Ahal Dugu eta Ezkerrako parlamentariek, eta 26 botoekin gehiengo osoz izendatua izan da presidente, lehen bozketan. PSN abstenitu egin da, aurretik iragarria zuen bezala, eta kontra hamazazpi boto zenbatu dituzte, UPNrenak eta PPNrenak.

Berehala, txalo zaparrada bat entzun da Nafarroako Parlamentuan. Parlamentari asko eta asko zutitu egin dira; UPNkoek, berriz, eserita jarraitu dute. Adolfo Araiz EH Bildukoa eta Maria Txibite PSNkoa izan dira Barkos zoriontzen lehenak. Yolanda Barcina orain arteko presidentea eta Ana Beltran PPkoak ere, ordea, zoriondu dute.

Parlamentariek 17:30ean bozkatu dute azkenean Uxue Barkos presidente izateko hautagaitza. Egunean zehar Barkosek bere hautagaitza aurkeztu du, eta talde parlamentarioetako bozeramaileen agerraldiak entzun ditu. Aldaketaren alderdiek ongi-etorria eman diote Barkosi, eta babesa adierazi; UPNk, PSNk eta PPN, ordea, estu hartu dute, baina bere erantzunean bere gobernuaren ardatza akordio programatikoa izango dela erantzun du Barkosek.

Maiatzaren 24ko udal eta foru hauteskundeak izan eta ia hilabetera, Nafarroako zortzigarren presidente aukeratu dute, Geroa Bai (9), EH Bildu (8), Ahal Dugu (7) eta Ezkerraren botoekin (2). Aldaketaren alderdiak dira lau horiek, UPNk Nafarroa hemeretzi urtez gobernatu ondoren, denbora horretan guztian galdutakoa berreskuratu eta erkidegoaren egoera aldatu nahi dutenak. Ez zen posible izan 2007an (PSNk atzera egin zuelako), ezta 2011n ere (PSN gobernuan sartu zen UPNrekin); are gutxiago, 2014an (PSNk ez zuen babestu Barcinaren kontrako zentsura moziorik). Sozialistek azken urteetan babestu egin dituzte Miguel Sanzen eta Yolanda Barcinaren gobernuak, eta, azkenean, PSN gabe iritsi da aldaketa. 26 botorekin ziurtatua izango du lehen bozketan Barkosek aukeraketa.

Akordio programatikoa izango da gobernu berriaren ardatza, Barkosek berak gaur azaldu duenez. Ostiralean sinatu zuten. Hilabete honetan hainbat bilera egin dituzte aldaketaren alderdiek, eta 74 orrialdeko txosten batean jaso dituzte lau urte hauetan hartu beharreko neurriak eta zuzendu beharreko politikak. Hala ere, sei arlotan ez dute oraindik adostasunik lortu, tartean euskararen ofizialtasunean, eta aurrerago zehazteko utzi dituzte. Adostasuna handia izan da, ordea, Barkosekin gobernua osatuko duten kontseilarien izenak zehazterakoan. Joan den ostegunean eman zuen zerrenda Barkosek berak, eta aldaketaren lau alderdiak pozik agertu ziren osatutako taldearekin. Bost emakume eta bost gizon izango dira, eta hamarretik zazpi, euskaldunak.

Barkosek asteazkenean hartuko du kargua, 11:30ean, eta, horren ondoren, berehala hartuko dute kontseilariek. Horiek ez dute parte hartuko parlamentuaren gaurko saioan, Barkosek ez dituelako parlamentariak bere gobernuan nahi izan, ez eta alderdietako kargu organikoak ere. Gobernu teknikoa osatu nahi izan du, eta kontseilari guztiek ibilbide luzea dute aukeratuak izan diren arloetan. Manu Aierdik, horregatik, parlamentari izateari uko egin beharko dio gobernuan sartzeko, eta, horrekin batera, Nafar Buru Batzarreko presidentetza ere utzi beharko du. Geroa Bairen talde parlamentarioaren bozeramaile zenez, lan hori Koldo Martinezek egingo du gaurtik aurrera.

Hitzaldien ostean, bozketa

Barkosen hitzaldiarekin hasi da inbestidura saioa. Mugarik gabeko tarte bat izan du bere programa eta hautagaitza aurkezteko. Gero, ordubeteko etena egin dute, eta hitza hartzen hurrengoak talde parlamentarioen bozeramaileak izan dira. Hauteskundeetan ordezkaritza handiena lortu zuenarengandik hasi dira, eta Javier Esparza UPNkoak, Koldo Martinez Geroa Baikoak, Adolfo Araiz EH Bildukoak eta Laura Perez Ahal Dugu-koak hitz egin dute. PSNkoa, PPkoa eta Ezkerra taldekoak arratsaldean egin dute, 15:30etik aurrera, uste baino azkarrago. Barkosek horiei erantzuteko aukera izan du gero, eta bozeramaileek azken erantzuna ematekoa, azkenik.

Hitzaldien saioaren ostean, parlamentuko presidenteak bozketa ordua eman du, 17:30erako. Bozketa sekretua izan da. Parlamentariak 51 dira, eta 26ko gehiengo osoarekin lehenengoan aukeratu dute Barkos presidente. Eta Aznarezek bozketa ontzat eman ostean, txalo zaparrada batean hartu dute parlamentariek Barkos. Yolanda Barcina presidente ohia ere joan zaio zorionak ematera presidente berriari. Barkos Nafarroako zortzigarren presidentea izango da asteazkenetik, Jaime Ignacio del Burgo (UPN-PP), Juan Manuel Arza (UCD), Gabriel Urralburu (PSN), Juan Cruz Alli (CDN), Javier Otano (PSN), Miguel Sanz (UPN) eta Yolanda Barcinaren ondotik (UPN). 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna