Kontxako Bandera

Orain arteko onena

Lehen jardunaldian sekulako estropada berdindua jokatuta, San Juanek 2,14 segundoren aldea dauka Hibaikarekiko, eta hirurena Zumaiarekiko.

San Juango arraunlariak, ahalegin betean.
San Juango arraunlariak, ahalegin betean. Juan Carlos Ruiz / Argazki Press

Aitor Manterola -

2015eko irailak 8

Jakina zen Zumaia eta San Juanen artekoa izango zela Kontxako Banderako lehen jardunaldiko lehia, baina hirugarren ontzi bat sartu zaie bandera eskuratzeko borrokan, Hibaika.

San Juan atera da lehen kaletik, Hibaika bigarrenetik, Zumaia hirugarrenetik eta Orio laugarrenetik. Hasiera hasieratik izan da lehia estua bi faboritoen artean, eta lehen minutuetan Zumaia nagusituko zela zirudien arren, ziabogaren ondoren San Juanek hartu die aurre, Hibaika eta Zumaia ondo-ondotik zituela.

Azkenik San Juaneko neskentzat izan da garaipena, eta bi segundora geratu da Hibaika eta hirura Zumaia.

Dena den, ezer ez dago erabakita izan ere aldea horren txikia izanda, edozer gerta daiteke datorren igandeko jardunaldian.

Gustura emaitzarekin

Nerea Perez, San Juaneko patroia, pozik lortutako emaitzarekin. "Gogorra izan da. Batez ere ziaboga arte ia berdindurik joan garelako, nahiz eta gero lortu dugun aurretik jartzea. Ez dira segundo asko lortu ditugunak, baina aurretik egotea asko da".

Aldiz, egindako lanarekin ez da erabat gustora agertu Zumaiako patroia, Nagore Osoro: "Aurretik joan gara ia bide guztian, eta agian ez dugu behar bezala aprobetxatu tarte hori". Hala ere, Osorok berak nabarmendu duenez, "hiru segundo ez dira ezer".

Denborak

San Juan: 10 minutu eta 36 segundu

Hibaika: 10 minutu eta 38 segundu

Zumaia: 10 minutu eta 39 segundu

Orio: 10 minutu eta 49 segundu

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna