"Probokazioen gainetik" bake aldarria berretsiz irten da Otegi

Ikaragarrizko giroa jartzen ari dira Fermin Muguruza, Sorkun eta Solano. 'Sarri sarri' abesten, denak, dena emanda.

Fermin Muguruza, Xabi Solano eta Sorkun kantuan orain, eta jendea pozik, dantzan.

Poz zintzoa agertu du duela urte batzuk bizkartzainak zituztenek orain ez dituztelako behar. "Hitz eman genuen bakea ekarriko genuela, eta ekarri dugu. Orain irabaztea falta da".

Buru gainean jarri dioten txapela ezker abertzaleko militante historiko hilei eskaini die: Jokin Gorostidiri, Jon Idigorasi etabar.

Fermin Muguruza, orain, oholtza ginean

Askatasunaren alde borrokatzen duten emakume kurduak eta sahararrak agurtuaz amaitu du Otegik agerraldia.

Esaldi borobilak utzi ditu: "Orain irabaztea tokatzen da. Bakea eta elkarbizitza bai, baina askatasuna eta berdintasuna ere bai".

Berezkoa duen karisma ez duela galdu erakutsi du Otegik: eta berea duen esaldiari aldaera berria atera dio: "Egin irri, borroka egingo dugu eta. Eta borroka egiten badugu, irabazi egingo dugu"

Jon Idigoras, Txomin Ziluaga, Izaskun Larreategi, Jokin Gorostidiri eta borrokan aritu diren guztiei eskaini die txapela Otegik, "herria delako gure gizartean lehendakaria, abanguardia".

Ainhoa Lendinez aurkezleak eskerrak eman dizkie gerturatutako guztiei. "Egun handia da Euskal Herrian". Lorentxa Gimon ere libre dela gogora ekarri du, eta txaloka hartu dute; "euskal presoak, etxera" oihuka.

"Irabazteko garaia da. Bakea ta konbinentzia bai, baina askatasuna eta berdintasuna ere bai". #OtegiFree

— Oihana Elduaien (@oihanaelduaien) 2016(e)ko martxoak 1

Otegi: "Gure borroka ez da Anadluaziarren aurka, langileen borroka oztopatzen duten eliteen aurka baizik"

Otegi: "Gure borroka ez da Anadluaziarren aurka, langileen borroka oztopatzen duten eliteen aurka baizik"

Otegi preso guztiak etxeratzearen alde.

Txapela jarri diote eta lore sorte eman Otegi Libre Politika libre plataformako kideek. #OtegiFree pic.twitter.com/TF17WcGWVj

— Oihana Elduaien (@oihanaelduaien) 2016(e)ko martxoak 1

Ainhoa Lendinez aurkezleak eskerrak eman dizkie gerturatutako guztiei. "Egun handia da Euskal Herrian". Lorentxa Gimon ere libre dela gogora ekarri du, eta txaloka hartu dute; "euskal presoak, etxera" oihuka.

Miren Auriza: "Jausi egunero jausi gaitezke, baina altsatu ere bai"

Independetzia hotsa, txalo zaparrada eta emozio handia. @berria @ArnaldoOtegi #OtegiFree pic.twitter.com/p4vtv8jK27

— Oihana Elduaien (@oihanaelduaien) 2016(e)ko martxoak 1

"Ongi etorri inoiz joan behar ez hitzana", hasi du bertsoa Xabier Amurizak.

Hasi da ekitaldia

Lehertu da Elgoibar. Txalo, oihu eta poz. Arnaldo Otegi Plazan da. Amurizatarrak bertsotan.

Txalo zaparrada beroa, txalapartaren ttakuna, eta badator Arnaldo Otegi, ikurrinez eta senitartekoz inguratuta

18:30eko kanpaiel jo dute. Denak zubira begira daude.

Zahar eta gazte, plaza bete da Elgoibarren. Hotza kentzeko salto txikiak egiten batzuk, garagardoari zurrupaka besteak, irribarrea ahoan guztiak.

Elgoibarko plaza @ArnaldoOtegi-ren zain. #otegifree #askatasuna pic.twitter.com/bUBg7nkfF3

— Sortu (@sortuEH) 2016(e)ko martxoak 1

Gero eta zailagoa da Elgoibarko plaza gurutzatzea. Jende asko ari da elkartzen. Emozioa da nagusi. Poza.

Elgoibarko plaza beterik, jendea Otegiren zain.

Etorrera prestatzen Elgoibarren. @berria #OtegiFree pic.twitter.com/6mT79lgGfF

— Oihana Elduaien (@oihanaelduaien) 2016(e)ko martxoak 1

Zubitik etorriko da Elgoibarko plazara Otegi, eta bidea antolatzen ari dira ikurrinekin-eta. Plaza beteta dago, eta gustura sumatzen da jendea. Toki onar hartu nahi dute guztiek.

Indartsu eta lanerako prest irten da Otegi espetxetik. Etxera heldu berritan Elgoibarrera gerturatzeko deia egin dio jendeari, "independentzia eta presoen askatzea eskatzera".

#OtegiFree pic.twitter.com/MoEw11rQEJ

— Arnaldo Otegi (@ArnaldoOtegi) 2016(e)ko martxoak 1

Martin Garitano ere etorri da, Joxean Agirre, Juan Mari Olano, Karmele Aierbe, Txutxi Ariznabarreta...

"Espainiak euskal presoekin duen jarrerak ez du bakea eraikitzen laguntzen", salatu du Europako Aliantza Libreko kide Tatjana Zdanokak, eta ohartarazi dio Madrili "gorrotoan oinarritutako bere politikei buruz" hausnarketa egiteko garaia dela.

Plaza inguruko tarbernak jendez betetzen ari dira. Ordubete falta da harrera ekitaldirako, eta jendea badator.

Anhoa Lendinezek aurkeztu behar du ekitaldia; Amuriza aita-alabak bertsotan arituko dira, eta Otegik berak ere hartuko du hitza. Gero kontzertua. Festa izateko itxura dauka.

Ezker abertzaleko ordezkari politiko igari ari da biltzen: Rufi Etxeberria, Joseba Permach, Juan Joxe Petrikorena, Karmelo Landa, Jone Goirizelaia... CUPeko Anna Gabrien ere beraiekin da.

Sorkunek, Fermin Muguruzak eta Xabi Solanok abestuko dute ekitaldiaren amaieran. Eta frogak egin dituzte jada.

Harrera ekitaldia 18:30ean da hastekoa Elgoibarren. Azken prestaketetan ari dira, eta ordu eta erdi falta den arren, jendea gerturatzen ari da dagoeneko Elgoibarko plazara.

Elgoibarren ari dira plaza prestatzen Arnaldo Otegiren arratsaldeko ekitaldirako. Han da Oihana Elduaien kazetaria. BERRIAk zuzenean emango ditu hango irudiak.

Hainbat babes mezu jaso ditu Otegik nazioarteko eragileen artetik; haren irteera txalotu dute, besteak beste, Sinn Feinek Irlandatik eta HDPk Kurdistandik.

Anderson MEP welcomes release of Arnaldo Otegi https://t.co/pZU7hWjEo8

— Sinn Féin (@sinnfeinireland) 2016(e)ko martxoak 1

After 6 years Basque leader and peacemaker @ArnaldoOtegi has been released from prison #FreeThemAll pic.twitter.com/UolT65kyDj

— HDP English (@HDPenglish) 2016(e)ko martxoak 1

"Elgoibarrera, independentzia eta presoen askatasuna eskatzeko"

Etxean dago Otegi. Twitterren zabaldu duen bideoan eskerrak eman ditu sei urte eta erdian jaso duen sostenguagatik, eta gaur arratsaldean Elgoibarrera eta larunbatean Anoeta belodromora joatera gonbidatu du, "independentzia eta presoen askatasuna eskatzeko".

Nazioarteko hainbat hedabidek eman dute Otegiren irteeraren berri. Horietako batzuk:

Shanghai Daily: "Arnaldo Otegi euskal liderra espetxetik askatuta".

Euronews: "Euskal militante separatista Espainiako espetxetik askatua".

Le Monde: "Euskal lider independentista baten espetxe irteera".

Jaurlaritza: "Ez dugu ezer gehiago esateko"

Kazetariak galdetu eta galdetu aritu arren, Otegiren espetxe irteerari buruzko balorazio laburra egin du Josu Erkoreka Eusko Jaurlaritzako bozeramaileak. Nabarmendu du Otegi "normaltasunez" itzuli behar dela politikagintzara edo "etxeko kuarteletara". Ez du erantzunetan luzatu nahi izan: "Esan behar genuen guztia esan dugu". Bere Twitter kontuan ere ez dute Otegiren inguruko erantzunik jaso, nahiz eta prentsaurrekoaren berri zabal eman duten.

Nafarroako Gobernuaren erreakzioa

Ana Ollo Nafarroako Gobernuko eledunak ongietorria eman dio Arnaldo Otegi askatzeari, eta gaineratu du ezker abertzaleko buruzagiak "bakea eta elkarbizitza berreskuratzeko apustu politikoa" egin duela: "Irteera hau normaltasun demokratikoaren prozesu batean kokatu behar dugu".

Sare sozialez aparte, nazioarteko hedabideeetan oihartzuna izaten ari da Otegiren irteeraren albistea. Reuters agentziak zabaldu du: "Euskal militante separatista Espainiako espetxetik askatua".

Espainiako Gobernuaren erreakzioa

Espainiako Gobernuko jarduneko presidenteorde Soraya Saenz de Santamariak bermatu du Otegiren jarduna "gertutik zaindu" egingo duela bere irteera ez dadin bihurtu "terrorismoaren gorazarrean".

Pablo Iglesias: "Inork ez luke espetxera joan behar bere ideiengatik"

Pablo Iglesias Podemoseko Espainiako buruak Twitterren idatzi du txio bat Otegiz. Esan du albiste ona dela espetxetik ateratzea, eta inork ez lukeela kartzelan egon behar bere ideiengatik.

"Otegiren askatasunak agerian uzten du gatazka politiko bat badagoela", Sare plataformako bozeramaile Joseba Azkarragak adierazi duenez.

Tenperatura hotza izanagatik, giro beroa izan dute Logroñoko espetxe atarian. Maialen Unanuek egin du goizeko kronika: Eskuak eta hankak hotz, bihotzak bero.

"Lehendakari onena, herria", esan du Otegik gaur espetxetik atera ondoren. HBk 1986ko Eusko Legebiltzarrerako hauteskundeetan erabili zuen leloa da. Orduko horretan Juan Karlos Ioldi aurkeztu zuen Herri Batasunak lehendakarigai, 1987ko otsailean. Enekoitz Esnaolak Ioldi eta Jesus Egiguren (PSE) orduko legebiltzarreko presidentea elkartu zituen orain urte bete: Ibilian adiskidetzen.

Amaitu da Martxelo Otamendi, Enekoitz Esnaola eta Floren Aoizen mahai-ingurua.

#OtegiFree, mundu mailako joera Twitterren.

Goizaren irudi gehiago; Otegi oholtza gainean, lehen adierazpenak egiten.

Lorentxa Gimon ere, libre

Lorentxa Gimon Angeluko presoa ere aske geratu da jada, Rennesko espetxea atzean utzita. Larriki gaixo dagoela-eta, hura aske uztea ebatzi zuen joan den astean epaileak.

Aske da! #lorentxa #ongietorri pic.twitter.com/RFlylxDeno

— jon garmendia (@txuriya) 2016(e)ko martxoak 1

Autoan sartuta, badoa Otegi senideekin. Arratsaldean, sorterrian egingo diote ongietorria, Elgoibarren.

Otegiren lehen hitzen bideoa Hodei Iruretagoienaren eskutik:

BIDEOA: @ArnaldoOtegi: "Lehendakaririk onena, herria" @berria #OtegiFree #askatasuna pic.twitter.com/NhKrgGMDyq

— Hodei Iruretagoiena (@hirual) 2016(e)ko martxoak 1

Sortuko presidentearen eta idazkari nagusiaren arteko lehen bilera espetxetik kanpo.

El presidente de Sortu Hasier Arraiz saluda por primera vez en la calle al Secretario General #OtegiFree pic.twitter.com/qdFzwrQnv7

— Sortu (@sortuEH) 2016(e)ko martxoak 1

Otegiren lehen hitzak

Kartzela aurrean jarritako oholtzaren gainean, lehen hitzak egin ditu Otegik. "Probokazio guztien gainetik" ezker abertzaleak abiatutako estrategiari eusteagatik eskerrak eman ditu, eta nabarmendu du preso politikoak badaudela Espainiako Estatuan. "Euskaldun bezala sartu gintuzten eta euskaldun irteten gara. Euskaldunak gara eta harro gaude. Independentista bezala sartu gintuzten eta independentistago irten gara. Sozialista bezala sartu gintuzten eta sozialistago irteten gara. Tokatzen dena da irekitako bidean sakontzea". Esaldi adierazgarri batekin amaitu du: "Lehendakaririk onena, herria".

Oholtza gainean da Otegi, eta aurreskua dantzatzen ari zaizkio.

Otegi espetxetik irten den unearen bideoa sareratu  du EH Bilduk. Ikus daitekeenez, zakuan Hegoafrikako bandera.

Irribarretsu irten da Otegi kartzelatik, eta apurka-apurka badoa eszenatokira. Bertan egingo ditu lehen hitzak, eta Elgoibarrera joango da ondoren.

Pixkanaka aurrerantza doa Otegi, motel, jende artean. Irteeraren bideoa:

BIDEOA: Otegi kalean da, irribarre batekin @berria #OtegiFree #askatasuna pic.twitter.com/BqT5zG3WT3

— Hodei Iruretagoiena (@hirual) 2016(e)ko martxoak 1

Irten da espetxetik Arnaldo Otegi, sei urte eta erdiko kartzelaldia eta gero. Independentzia eta euskal presoen eskubideen aldeko oihu artean irten da, eta senideak besarkatu ditu berehala. Paparrean, Kataluniako bandera eta presoen etxeratzearen aldeko ikurra. Irudian, Otegitarren hiru belaunaldiak:

Ezker abertzaletik harago ere txalotu dute Otegiren espetxe irteera. Tartean, Neskutz Rodriguez EAEko Ahal Dugu-ko kideak eta Izquierda Unidak:

.@ArnaldoOtegi Kartzelatik irteteko eguna heldu da.Pozten naz. Euskadi baketsua eta biolentziarik gabekoa geldiezina da

— Neskutz (@neskutzro) 2016(e)ko martxoak 1

Vale, pero por el momento: #FreeOtegi https://t.co/36B7aAAUGa

— Izquierda Unida (@iunida) 2016(e)ko otsailak 29

Aoiz: "Gaur ez du bakarrik kartzelaren marra zeharkatzen. Hemendik aurrera beste zerbait da".

Otegiren figuraz eta lidergoaren kontzeptuaz, Aoiz: "Ezker abertzaleak beti izan ditu erreferente pertsonalak", baina "pertsonalismoetan" erori gabe.

Otegiren senideak espetxearen atariko lehen lerroan, urduritasun aurpegiekin. Atzean dozenaka kazetari, lagun eta eragile politiko.

Realeko bandera bat ziegatik... edozein unetan irten daiteke.

Errealeko bandera bat ziega batetik. Oihuak kartzela osotik. Badatorren seinale? #OtegiFree #Askatasuna @berria pic.twitter.com/BnNRwemi5X

— Hodei Iruretagoiena (@hirual) 2016(e)ko martxoak 1

Espainiako Estatuan Twitterreko joeren artean dago #OtegiFree.

Bateragune auzian, Espainiako judikatura, gobernua... "mendekuan eta sabotajean" aritu direla uste du Floren Aoizek.

Hodei Iruretagoiena, Maialen Unanue eta Lara Madinabeitia lankideak egiten ari diren bideoak ikus daitezke Periscopeko kanalean:

https://www.periscope.tv/berria

Hasi da BERRIAren erredakzioan Otegiren espetxe irteerari buruzko saio berezia, Enekoitz Esnaola BERRIAko kazetaria, Martxelo Otamendi BERRIAko zuzendaria eta Floren Aoiz Iratzar fundazioko presidentea hizketan.

Presondegia atzean uztean, jende ilara bat izango du zain Otegik, ikurrinak eta presoen eskubideen aldeko banderolak eskuan.

Gaur Logroñon nahiz Elgoibarren eta larunbatean Anoetako belodromoan egitekoak diren ekitaldiak ez ditu debekatu Auzitegi Nazionalak, baina Velasco epaileak agindu du horiek "zaintzeko", ikusteko "terrorismoaren gorazarre" deliturik egiten ote den.

08:00ak pasa, aurki hasiko du BERRIAk zuzeneko emisioa kartzela ataritik. Ikusmin izugarria bertan, une batetik bestera atera baitaiteke Otegi. Andaluziatik ere joan dira:

Elkartasun internazionalista ere presente: Andaluziatik SATeko kideak bandera eta guzti #OtegiFree @berria pic.twitter.com/1M3udPnYF0

— Hodei Iruretagoiena (@hirual) 2016(e)ko martxoak 1

Ezker abertzaleko kide ugari ere joan dira Logroñoko espetxe atarira; tartean, Hasier Arraiz Sortuko presidentea eta Iker Casanova EH Bilduko legebiltzarkidea.

Irribarreak #Logroño -ko presondegiko atean. Gasteizko lanak geroko utzi ditugu. pic.twitter.com/1ExkfkFhnL

— EHBildu Legebiltzar (@ehbildu_legebil) 2016(e)ko martxoak 1

Erreakzio gehiago Logroñoko kartzela ataritik:

Anna Gabriel (CUP): "Gatazkari irtenbide baketsua bilatzeagatik dago preso Otegi, beste hamaika bezala".

Lluis Llach (kantaria eta Junts Pel Si-ko parlamentaria): "Arnaldoren jarduera garrantzitsua izango da Euskal Herriarentzat"

Julen Arzuaga (EH Bildu): "Espero dut ideia eta proiektu politiko guztiak defendatzeko aro bat irekitzea"

Anna Gabriel: "Gatazkari irtenbide baketsua bilatzeagatik dago preso Otegi, beste hamaika bezala" #OtegiFree @berria pic.twitter.com/aADhpbJDLE

— Hodei Iruretagoiena (@hirual) 2016(e)ko martxoak 1

1990ko hamarkadan ezker abertzalearen bozeramaile lanak bere gain hartu, eta harrezkero horretan jardun du Otegik. Bakegintzan eginiko lana aitortu diote askok, eta bidegabetzat jo azken espetxealdia. Guztira, ordea, hamalau urte egin ditu preso, auzi ugaritan. Hodei Iruretagoienaren laburpena:

Espetxe atarian hainbat erreakzio biltzen ari dira Lara Madinabeitia, Maialen Unanue eta Hodei Iruretagoiena BERRIAko kazetariak.

Martin Garitano: "Arnaldok beste politikari batzuek ez duten ahalmena dauka: entzuteko ahalmena".

Santi Vidal (ERC): "Herritar guztien eskubide eskubide zibilak errespetatu behar dira".

Fermin Muguruza: "Sekulakoa da hemen sentitzen dena. Desio dudana da preso denak ateratzea".

Fermin Muguruza: "Sekulakoa da hemen sentitzen dena. Desio dudana da preso denak ateratzea" #OtegiFree @berria pic.twitter.com/s9CNSrr5nZ

— Hodei Iruretagoiena (@hirual) 2016(e)ko martxoak 1

2009ko urrian atxilotu, eta Bateragune auzian zigortu zuten Otegi. Iazko urrian irten ziren Sonia Jacinto, Miren Zabaleta eta Arkaitz Rodriguez, eta 2017ko abuztu-irailean irtengo da auziko azken presoa: Rafa Diez. Bateragune auzia-ren laburpen bideoa:

Irteeran Otegik zein asmo duen, Jaurlaritzako lehendakarigai izango ote den, utziko dioten... zalantza horietako bat behintzat argitu zen bart; New York Times egunkariari baieztatu dio EH Bilduren barne prozesura aurkezteko asmoa duela lehendakarigai izateko.

Gogoan izan gaurko egitaraua; kartzela irteera zuzeneko irudiekin emango du BERRIAk. 18:30ean, ongietorri ekitaldia egingo diote Otegiri Elgoibarren (Gipuzkoa), eta horren berri ere zuzenean emango du BERRIAk. Larunbatean Anoetako belodromoan egingo dioten ekitaldia ere zuzenean ikusgai izango da.

.@ArnaldoOtegi-ren kartzela irteera, zuzenean BERRIAn https://t.co/jPeQs6UxsL pic.twitter.com/ifXUnks2mY

— Berria.eus (@berria) 2016(e)ko otsailak 29

Espetxetik irteteko ordu finkorik ez du Otegik, baina 08:00etarako prest izango dute espetxe atarian eszenatoki bat, hura irteten denean lehen hitzak egin ditzan. Jada komunikabide ugari daude kartzelaren aurrean, zain.

Komunikabide ugari dagoeneko Logroñon #OtegiFree #Askatasuna @berria pic.twitter.com/CQ4cmUh1eo

— Hodei Iruretagoiena (@hirual) 2016(e)ko martxoak 1

Sare sozialetan #OtegiFree eta #Askatasuna traolak erabiltzen ari dira Otegiren espetxe irteeraren inguruko iruzkinak biltzeko. Otegiren Twitter kontutik politikari presoaren argazki bat argitaratu dute gaur bertan... Nelson Mandelari espetxean eginiko irudi bat gogora dakarrena:

.@ArnaldoOtegi-ren azken uneak espetxean, Mandela gogoan https://t.co/yGiBaNmNQ8 #OtegiFree #Askatasuna pic.twitter.com/lX2LRZO76l

— Berria.eus (@berria) 2016(e)ko martxoak 1

Egun on. Sei urte eta erdiko zigorra bete ostean, gaur berreskuratuko du askatasuna Arnaldo Otegi ezker abertzaleko buruzagiak. Egunaren jarraipen berezia egingo du BERRIAk.