AHAL DUGU

Nagua Alba izango da Ahal Dugu-ko idazkari nagusi Araban, Bizkaian eta Gipuzkoan

Roberto Uriarteren lekukoa hartuko du. Botoen %36,67 lortu du. Pilar Garrido izan da bigarren (%32,21), eta Neskutz Rodriguez hirugarren (%24,01). Hiritar Kontseiluko 34 kideetatik 28 dira Albaren zerrendakoak.

Alba eta bere taldeko kideak, kanpainan. /
Alba eta bere taldeko kideak, kanpainan. / Aurrera Begira/@aurrerabegira_

Jokin Sagarzazu -

2016ko martxoak 7

Nagua Alba Espainiako Kongresuko parlamentaria izango da Araba, Bizkaia eta Gipuzkoako Ahal Duguko idazkari nagusi. 1076 boto (%36,67) lortu ditu Albak. Pilar Garrido izan da bigarren, 943 botorekin (%32,21) eta Neskutz Rodriguez hirugarren, 707rekin (%24,01). Parte hartzea %21,55koa izan da. Denera, 3.203 lagunek eman dute botoa.

Espainiako Podemosen zuzendaritzaren babesa zuen Albak, eta berarekin batera Aurrera Begira deituriko zerrendan aurkeztutako kideak izango dira nagusi Hiritar Kontseiluan. Zuzendaritzako 34 kideetatik 28 dira talde horretakoak. Era berean, Bermeen Batzordeko sei kideetatik bost dira Aurrera Begira-koak, eta bestea independentea.

Pilar Garrido Kaliangorako hautagaia izan da bigarren bozkatuena. Sei kide baino ez ditu izango Hiritar Kontseiluan. Roberto Uriarte idazkari naguisi ohiaren babesa zuen korronte horrek. Zenbait iturrik zabaldu dutenez, emaitzak jakin aurretik auditoria bat eskatu dute Kaliangorakoek.

Neskutz Rodriguezen Zurekin Ahal Dugu hautagaitzak ez du ordezkaririk izango zuzendaritza berrian, ezta ere Amaia Arkotxaren Euskadi Baita Ere-k. Aurreko zuzendaritzan ordezkaritza zuten talde horiek, eta Rodriguez kide ere bazen.

Sergio Pascualek eman du gaur astelehen arratsaldean izendapenaren berri. Berez, biharko iragarri zituzten emaitzak, baina gaur arratsaldera aurreratu dute, zenbaketa aurreikusi baino bizkorrago egin dutelako, sistema informatikoek zuzen funtzionatu dutelako, Pascualek azpimarratu duenez.

Albak (Donostia, 1990) gertutik ezagutu zuen Podemosen sorrera. Madrildik Euskal Herrira eta alderantziz aritu da azken urte eta erdian. Psikologia lizentziaduna da. Espainiako hiriburuan ikasketak egiten ari zela hurbildu zen Pablo Iglesias, Iñigo Errejon eta besteen taldera. Podemosen Herritar Kontseiluko kide izandakoa da —sare sozialen arduraduna—, eta Espainiako Gorteetarako bozetan diputatu aukeratu zuten Gipuzkoan.

Ia 15.000 lagun zeuden izena emanda. Ostegunean hasi duten Ahal Dugun zuzendaritza berria aukeratzeko bozketa. 15.000 lagunek eman zuten izena bozketan parte hartzeko. Roberto Uriarte aurreko idazkari nagusiak kargua utzi zuenetik, zuzendaritzarik gabe zegoen Araba, Bizkai eta Gipuzkoako Ahal Dugu, iazko azarotik. Podemoseko buruen konfiantzarik ez zuelako utzi zuen kargua Uriartek, azaroan, baina Araban, Bizkaian eta Gipuzkoan ere bazituen kontrarioak. Batzorde tekniko bat eratu zuten kanpainarako. Otsailaren 29an hasi zuten hautagaiek kanpaina, eta igandean amaitu zen.

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna