Politika
Erabakitzeko eskubidea zehazteke utzi du EAJk akordio proposamenean
Eskubide horrek "sakontze lana" behar duela diote jeltzaleek. EAJren proposamena da legebiltzar taldeek "hitzematea" Espainiak errespetatuko duela euskal herritarren borondatea.
Erabakitze eskubidearen zilegitasunari eta erabaki esparruei buruz sakondu egin behar dela dio alderdi jeltzaleak autogobernuari buruzko lantaldeko ondorioekin idatzitako txostenean. Lantalde horretako jardueretatik atera duten ondorio bat da erabakitzeko eskubidea bere erara ulertzen duela alderdi bakoitzak, eta beraz, kontzeptua bera argitu behar dela.
Akordio proposamenarekin txostena idatzi du EAJk, eta txosten hori aurkeztu die gaur PSE-EEko, PPko eta UPDko ordezkariei. EH Bilduri ez diete aurkeztu, koalizio abertzaleak jeltzaleen aldebiko bileretan parte ez hartzea erabaki duelako, "antzerkia" eta "zirkua" dela iritzita. Jeltzaleek aukeratutako prozesura ez dela "serioa" uste du EH Bilduk.
Nolanahi ere, Andoni Ortuzar EAJren EBBko buruak lan serioan ari direla azpimarratu du. Legegintzaldia amaitu aurretik "gutxienekoak" adostea nahi dutela esan du, hurrengo legegintzaldian gutxieneko horien gainean lanean hasteko. Gainera, PSE-EErekin eta EH Bildurekin ados jartzeko aukera badagoela azpimarratu du.
Kontzeptua argitu behar dela esan ostean, "Estatuko instituzioek" euskal herritarrek "libre eta demokratikoki" hartzen dituzten erabakiak errespetatu egin beharko dituztela dio EAJk, txostenean.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
