ESPAINIAKO GORTEETARAKO HAUTESKUNDEAK

Ione Belarra: "Bigarren postua jada ez da nahikoa; irabaztea da gure helburua"

Unidos Podemos koalizioak ekainaren 26ko hauteskundeetarako hautagaitza "plurala" aurkeztu du.

Unidos Podemoseko Nafarroako hautagaien aurkezpena.
Unidos Podemoseko Nafarroako hautagaien aurkezpena. / @podemosnavarra

Maialen Belarra -

2016ko maiatzak 24

Ione Belarra (Ahal Dugu) Espainiako Kongresurako koalizioaren lehen hautagaiak ziurtatu du aurkeztutako hautagaitzak Nafarroako pluraltasuna "ordezkatzen eta irudikatzen" duela: "Asko poztu gaitu Ezkerrarekin eta Equorekin adostasun bat erdietsi izanak. Gai izan gara eskuzabalak izateko, eta bat egiten dugunean biltzeko".

Belarraren atzetik, Eduardo Santos (Ahal Dugu) izango da zerrendako bigarrena, eta Eliana Aleman (independentea) hirugarrena. Senaturako, berriz, Iñaki Bernal (Ezker Batua) izanen da lehen hautagaia, eta Aitor Pescador (independentea) bigarrena.

Belarrak baieztatu du UPN-PP blokea gainditzeko asmoa dutela, eta argi utzi du etsaia ez dela PSOE, PP baizik. Santosek bat egin du ideia horrekin: "Gure indarrak batu nahi ditugu UPN eta PPren politikak bertan behera utzi ahal izateko. Hori izango da benetako aldaketarako berme bakarra".

"Aukera historikoaz" hitz egin dute hautagaiek. Santosek gogorarazi du PSOEk bere eskuetan izan duela "aldaketarako giltza", baina ez zela gai izan "zaharraren eta berriaren artean aukeratzeko".

Bestalde, Alemanek krisiaren ondorioz pobrezian dauden pertsona guztiei egin die erreferentzia, eta jakinarazi du pertsona horien eskubide sozialen alde lan egiteko bat egin duela Unidos Podemos koalizioarekin. Bernalek ere herritarren interesak babestuko dituztela azaldu du, eta ez enpresa handienak: "Bat egiten dugu helburu batean: erakundeak erreskatatu eta herritarren zerbitzura jarri nahi ditugu. Horretarako irabazi behar dugu, ez dago beste aukerarik".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna