HEZKUNTZA

Bernat Etxepare lizeoan orduak falta dituztela salatu dute Baionan

Baionako Akademia Ikuskaritza aitzinean bazkaldu dute Bernat Etxepare lizeoko ikasle, guraso eta irakasleek. Falta dena betetzeko, ordu batzuk dohainik egiten ari dira irakasle gehienak.

Baionako Bernat Etxepare lizeoko ikasle, gureaso eta irakasleak Akademia Ikuskaritzaren aitzinean bildu dira, 2016ko ikasturterako ordu gehiago eskatzeko. ISABELLE MIQUELESTORENA
Ekhi Erremundegi Beloki.
2016ko irailaren 13a
17:27
Entzun

Bernat Etxepare lizeoan izena eman duten Bigarreneko 106 ikasleak 3 gelatan banatu nahiko lituzke Baionako Akademia Ikuskaritzak; 35 ikasletik gora klaseka. Egoera hori salatu nahi izan dute gaur eguerdian lizeoko ikasle, guraso eta irakasleek, ikuskaritza aitzinean egin duten bazkari-elkarretaratzean. 260 pertsona bildu dira, baliabide gehiago eskatzeko. Sartze egunetik ari dira protestan. “Zerbitzuekin mintzatzen saiatu gara, Seaskak ere harremanak izan ditu, baina momentuko blokatua da”, esplikatu du Jean François Mateo Etxepare Lizeoko presidenteak.

Ikasturte batetik bestera ikastetxe bakoitzak izanen duen postu kopurua zehazteko, otsailean egin ohi dituzte prebisioak. Aurten, lau gela irekitzeko aukera ikusten zuten Bernat Etxeparen, eta hala jakinarazi zioten akademia ikuskaritzari; ezezkoan erantzun zien. Ekaineko izen emateetan, lau gela osatzeko ikasle kopurua bildu zuten, eta araberan prestatu zituzten ikasle eta irakasleen egitarauak. Baina ikasturtea hasterako, lau gelak normaltasunean ireki ahal izateko baliabideak falta zaizkie.

Falta dena betetzeko, irakasle gehienak ordu batzuk dohainik egiten ari dira; hala, lau gelak irekitzea lortu dute. Hala ere, klase guziak emateko orenak falta zaizkiete: “leporatzen digute aberats izatea, ikasle guziek herritar heziketa eta lanak egiteko orduak ukatea nahi dugulako; baina, hori da gure proiektua!”, salatu du Mateok. Hemendik aitzina ere, negoziatzen eta protestan segituko dutela iragarri du: “gaur kanpoan ginen; ondoko aldian, barnera sartu beharko dugu beharbada”.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.