AROZTEGIA

"Herritarren hitza errespetatzeagatik" auzipetu dituztela salatu du Baztango alkateak

Epailearen aurrean deklaratu dute Joseba Otondo alkateak eta Garbiñe Elizegi alkate ohiak, Palacio de Aroztegia enpresak aurkeztutako kereila dela eta. Prebarikazio salaketen aurrean, "une oro legearen barruan" jokatu zutela esan du Otondok.

Baztano bizilagunak eta ordezkari politikoak, auzitegiaren atarian.
Baztano bizilagunak eta ordezkari politikoak, auzitegiaren atarian. JAGOBA MANTEROLA / ARGAZKI PRESS

Ion Orzaiz -

2016ko urriak 6

Baztango hamaika bizilagun eta ordezkari politikok babesa agertu diete Otondo eta Elizegiri Nafarroako Auzitegiaren atarian eginiko elkarretaratzean. "Jazarpen judizialik ez! Aroztegia gelditu!" leloa zeraman pankarta atera dute, eta han izan dira deklarazioak iraun duen bitartean.

Auzitegira sartu aurretik, Otondok ukatu egin ditu prebarikazio salaketak, eta une oro "legediaren arabera" jokatu dutela berretsi du. Halaber, Palacio de Aroztegia enpresaren estrategia bati egotzi dio kereila. "Enpresak ahul ikusten du bere burua, eztabaida galtzen ari da eta argumenturik ez du. Horregatik, helburu garbia du: Aroztegia proiektuaren inguruko eztabaida desbideratzea".

"Auzia oso sinplea da, demokrazia ala inposizioa. Baztandarrak gai garen proiektu honi buruz eta Baztanen etorkizunari buruz erabakitzeko, ala erabaki guztiak inposatuko dizkiguten, PSIS udalaz gaindiko planarekin egin duten bezala", gaineratu du. Testuinguru horretan, orain arte erakutsi duten jarreraz "harro" azaldu dira Otondo eta Elizegi. "Egindakoa berresten dugu, herritarren hitza entzun besterik ez baitugu egin, eta horregatik zigortu nahi gaituzte. Ebrotik hegoaldera, politikariak ustelkeria kasuengatik epaituak izaten ari diren unean, gu epaituko gaituzte herritarren hitza errespetatzeagatik eta herritarren zerbitzura egoteagatik. Eta hau da gure ordaina".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna