Indonesiako Batavia Madrigal Singers taldea izan da Tolosako (Gipuzkoa) 48. Abesbatza Lehiaketako garaile nagusia. Gaur bukatu da lehiaketa. Asiako taldeak Kutxa sari nagusia lortu du, eta, gainera, talde onena izan da polifonia eta folklore sailetan. Era berean, kantu koraleko Europako sari nagusian lehiatzeko txartela lortu du Indonesiako abesbatzak; Tolosan bertan jokatuko da txapelketa hori, 2017an. Vocalia taldea Euskal Herriko abesbatza, bestalde, musika profanoko sailean izan da nagusi. Euskal taldeak, gainera, Eusko Jaurlaritzak euskal kanta baten interpretazio onenari ematen dion saria lortu du, Josu Elberdinen Ikusten duzu goizean piezari esker.
Polifonia sailean, Esloveniako St. Nicholas Choir Litija taldeak lortu du bigarren saria, eta Letoniako Female Choir Balta abesbatzak hirugarrena. Folkloreari dagokion atalean ere lortu du bigarren postua Esloveniako taldeak, eta hirugarrena Letoniakoak, kasu horretan, Vocalia taldearekin berdinduta. Musika profanoan, Erresuma Batuko Apollo 5 taldea sailkatu da euskal taldearen atzetik, eta Suediako Svanholm Singers abesbatzak lortu du hirugarren tokia. Publikoaren Saria, azkenik, Esloveniako St. Nicholas Choir Litija taldearentzat izan da.
