930 puntu eskuratuta, Etxahun Lekue (Larrabetzu, 1980) da Bizkaiko Bertsolari Txapelketako txapeldun berria. Xabat Galletebeitiarekin batera jokatu du buruz burukoa (893,5). Haien ostean sailkatu dira Jone Uria (549,5), Onintza Enbeita (538), Ibon Ajuraigojeaskoa (535,5), Nerea Ibarzabal (534), Miren Amuriza (531,5) eta Beñat Ugartetxea (510,5). Horrenbestez, bere lehen txapela eskuratu du Lekuek.
Udaberrian hasi zen aurtengo Bizkaiko Txapelketa, eta gaur bukatu da, Bilboko Miribilla pabiloian. Xabier Amurizak jantziko dio txapela aurtengo irabazleari. Aurtengo maiatzean —75 urte bete zituen egunean— iragarri zuen Amurizak bertsolaritzaren jardun publikoa utzi, eta erretiroa hartuko zuela.
