Durangoko bonbardaketa
1937an Durango bonbardatu zuten militarrak identifikatu dituzte
Gerediaga elkarteak sarraskiaren inguruko datuak bildu ditu, Durangoko Udalaren enkarguz. Egileen aurkako kereila aurkeztuko dute orain herriko epaitegietan.
Jon Irazabal ikerlariak gidatutako lanari esker, Durangoko bonbardaketari buruzko datu berriak topatu dituzte. Erromako eta Madrilgo bi artxibo historikotan begiratuta ondorioztatu dute, besteak beste, hiru izan zirela bonbardaketan parte hartu zuten hegazkin bonbaketariak, eta bonba su-eragileak erabili zituztela. Informazio hori bonbardaketan parte hartu zuten eskuadrilen egunerokoak eta liburu teknikoak aztertuta lortu dute.
Gainera, bonbardaketa planifikatu eta egin zuten militarrak identifikatu dituzte, baita ekintza helburu militarrekin egin ez zela frogatzen duten lekukotzak topatu ere. Bestelako hiru helburu izan zituztela ondorioztatu dute: Bonben eraginkortasuna aztertzea, Euskal Gobernuak amore ematea eragitea eta nazioarteko komunitate politikoari erakustea Hitler eta bere Reich-a zer egiteko gai ziren.
Durangoko Udalaren enkarguz egin du ikerketa Gerediaga Elkarteak. Orain, informazio hori oinarri hartuta udalak bonbardaketaren erantzuleen aurkako kereila aurkeztuko du Durangoko epaitegietan. Sarraskian parte hartu zuten gehienak hilda egotea “litekeena” izan arren, jakinarazi dute bik behintzat bizirik jarraitzen dutela.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.