Makina-erreminta %8 inguru haziko da aurten

Zerua urdin ikusten dute, oro har, makina-erremintaren sektorean. 2016. urtea ez da txarra izan, ilbeltzean aurreratu zuen moduan, AFMk %1,5eko hazkundea ezagutarazi du gaur, baita 1.500 milioi euroko salmenta guztien %85 esportazioak izan zirela ere, %6,5 inguruko igoerarekin (1.185 milioi euro). Aurpegi baikorrak aurtengo aurreikuspenek eragiten dituzte, hala ere. 2016. urtean lortutako lan poltsak ikusmina eragin du alorreko enpresetan, eta %8 inguruko hazkundea espero dute. 626 milioi euroren enkarguak lortu zituzten AFMko 122 enpresek (gehien-gehienak Euskal Herrikoak), eta, orain, haiek entregatu behar dira, eta AFMk %8ko kopuru hori eman du, zuhur izanda. Hazkunde horrek, langileen kontratazio berriak ekarriko dituela aurreratu dio BERRIAri Xabier Ortueta AFMko zuzendariak: "Normalean, horrela izango da". Gaur egun, 6.200 enplegu zuzen ematen ditu sektoreak.

Antxon Lopez Usoz presidentea munduari begira jarri da esateko baikor daudela, gauzak aldatzen hasiak direla Europan, "Alemania hazten ari dela", eta horrek makina-erremintan inbertsioa dakarrela. Onartu du brexit-ak ziurgabetasuna eragiten duela, baita Trumpen protekzionismoak ere, baina Txina, Errusia eta Brasil bera hobeto ikusten ditu, eta haietatik azken urteotan baino kopuru hobeak espero ditu AFMko enpresentzat.

"Inflexio puntua gertatu da merkatuan", esan du Lopez Usozek. Ziurgabetasuna ez dela berehala desagertuko egia da, baina AFMko burua baikor dago oso, batez ere Europa martxan jarri delako, eta Alemania delako euskal industriaren sektore garrantzitsu horrentzat oinarrizko merkatua.

Deformazioa eta autogintza

Azpisektoreen artean gorabehera batzuk egon dira azken urtean, eta oso litekeena da aurten ere bere horretan segitzea egoera horrek. Deformazioak —txapan lan egiten duten makinak— gorantz bultzatu ditu salmentak, autogintzaren olatuari esker. Auto ekoizleak inbertsio betean dira, beren sektorea jarduera bizian delako azken bi-hiru urteotan. Abiaburuan ahulago daude enpresak. "Ez dira kopuru txarrak, baina deformazioak ezarri du aldea". Izan ere, 2016. urtean %56 igo dira salmentak; txanponaren beste aldean abiaburu dago, esan bezala, %4,7ko jaitsierarekin.

Eta ematen du aurten ere deformazioaren azpisektorean diharduten enpresek aparteko urtea izango dutela eskaerei begira, urteko lehen hiruhilekoan eskaera poltsak erritmoari eutsi diolako; lehen hiru hilabete horietan, iazkoetan baino %22 enkargu gehiago jaso dira. Hala ere, zaila da jakitea urteko eboluzioa nolakoa izango den. "Goizegi da", ohartarazi du Ortuetak.