Ingurumena

Inoizko izozmendi handienetako bat askatu da Antartikan

Izozmendiak 5.800 kilometro koadroko azalera du, eta Larsen C deituriko ingurutik askatu da. Datozen egunetan izozmendia zati txikiagoetan banatu litekeela uste dute adituek.

Arrakala bat  Antartikoko Larsen C eremuan. /
Arrakala bat Antartikoko Larsen C eremuan. / John Sonntag/EFE

Berria -

2017ko uztailak 12

Midas Proiektua osatzen duten zientzialariek eman dute abisua. Hiru egunen buruan 5.800 kilometro koadroko izozmendia —Arabaren azalera halako bi du— askatu da Antartikako Larsen C deituriko eremutik. Izozmendia banatzeak %12 murriztu du Antartikako Larsen C eremuaren neurria, eta adituek ohartarazi dute datozen urteetan erabat desager litekeela inguru hura, aurretik Larsen B izenekoarekin gertatu moduan.

Izozmendia bera Antartikatik gertu geratuko dela uste dute zientzialariek, baina ez daude seguru hartuko duen joerarekin. Datozen egun eta asteetan beste hainbat zati askatu eta Antartikatik iparraldera joan litezkeela uste dut. Zati nagusia desegiteko, hala ere, hainbat hamarkada igaroko direla uste dute.

"Orain arteko izozmendirik handienetako bat da honakoa, eta zail da zer gertatuko den aurreratzea. Gerta liteke Larsen C berriz ere handitzen joatea, baina baita izozmendi gehiago askatu eta desagertzea ere", zehaztu du Adrian Luckmanek, Midas Proiektuko kideetako batek.

Handiagoak ere bai

Arabako azalera biderkatzen duen izozmendi hori ez da, ordea, historian askatutako handiena. Duela hamazazpi urte, 11.000 kilometro koadroko beste izozmendi erraldoi bat askatu zen Antartikan —Nafarroa Garai guztia baino handiagoa—. Sei urte geroago, izozmendiaren zatiak aurki daitezke oraindik inguru hartan.

Aurretik, 1956an, AEBetako itsasontzi batek 32.000 kilometro koadro inguruko izotz zati erraldoi bat topatu zuen —Belgika baino handiagoa—. Ez dago, ordea, orduko irudirik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna