Feministak indarrak batuta irtengo dira larunbatean

Indarkeria Matxistaren Kontrako Nazioarteko Eguna baliatuko dute Gasteizko feministek indarkeria matxista jasan duten biktimen testigantzei balioa emateko. "Auzitegiek, poliziek, hedabideek, baita inguruko hurbilenek ere erasotzaileak babesten dituzte, biktimaren egia zalantzan jarriz. Baina guk elkarri sinisten diogu. Gure hitzak balioa du", adierazi du Zuriñe Rodriguez Koordinadora Feministako kideak. Horregatik, Zure egia, gurea eginez lelopean manifestazioak antolatu dituzte larunbaterako, azaroaren 25erako, Euskal Herriko hiri nagusietan: Baionan, 11:00etan, udaletxean; Gasteizen, 18:30etan, Andra Mari Zuriaren plazan; Ordu berean, Bilbon, Jesusen Bihotzean; Donostian, 19:00etan, Bulebarrean; eta Iruñean, 20:00etan, Gaztelu plazan.