Angela Merkel Alemaniako jarduneko kantzilerrak eta Martin Schulz sozialdemokraten buruak negoziatzeko oinarritzat erabiliko duten dokumentua hitzartu dute, koalizio handia eratzeko. Bi alderdietako talde negoziatzaileek aste osoa egin dute hizketan, eta azken 24 orduan baino gehiagoan hainbat bilera egin dituzte. Azkenean, zeuzkaten ezberdintasun handienak gaindituta lortu dute aurrera egitea. Der Spiegel eta Bild egunkari alemaniarrek azaldu dutenez, politika fiskalean eta immigrazio gaietan izan dute akordioa ixteko arazo gehien, baina ez da hizketaldiei buruzko adierazpen ofizialik egon.
Merkelek joan den irailean irabazi zituen Alemaniako bozak, baina gobernua osatzeko gehiengorik ez zuen eskuratu, eta berdeekin eta liberalekin negoziatzen saiatu zen, baina liberalak mahatik altxatu ziren aurreakordioa lortu aurretik. Sozialdemokratek ez zuten asmorik Merkelekin koalizio handia errepikatzeko, aurreko legealdiko kudeaketa zigortu dutelako bozkatzaile sozialdemokratek. Baina akordiorik ez bada, hauteskundeetara joatea besterik ez da geratzen.
Asko dago egiteko oraindik, ordea; izan ere, militante sozialdemokratek urtarrilaren 21eko ezohiko batzordean onartu beharko dute proposamena, eta, gainera, bi aldeetako politikariek ohartarazi dute ez dela akordiorik egongo oztopo guzti-guztiak gainditzen ez diren arte.
