"Ez naiz inoiz eseriko negoziazio mahaian Ivanovicen hillketarengatik erantzunik jasotzen ez badugu", esan dio gaur RTS Serbiako kate publikoari Marko Djuric Belgraden delegazioko negoziatzaileak. Djuric Bruselara joan zen atzo, EB Europako Batasunaren bitartekaritzaz Kosovoko Gobernuaren ordezkaritza batekin elkartzeko. Oliver Ivanovic SDP Alderdi Sozial Demokratako buruzagiaren hilketaren berri izan ondoren, ordea, bilera bertan behera utzi zuen Djuricek.
Urtebete baino gehiago igaroa zen bi gobernuak elkartu ziren azken alditik. Serbiak EBko kide izan nahi du, eta Kosovok zailagoa duen arren, batasunera gehiago gerturatu nahi du, baina Bruselak baldintzatzat jarria die bake akordio bat egitea.
1998-1999ko gerraren ondoren, Serbiak Kosovoko probintziaren kontrola galdu zuen, eta 2008an Kosovok independentzia aldarrikatu zuen. Serbiak ez du hori onartzen, ezta EBko bost estatuk ere.