HEZKUNTZA

D ereduaren aldeko kanpaina aurkeztu dute Euskarabideak eta 24 tokiko entitatek

Euskarazko ereduak eskaintzen duen "kalitatea, 40 urteko esperientzia eta eleaniztasuna" nabarmendu dituzte kanpainaren sustatzaileek.

Kanpainaren barruan banatuko dituzten eskuorrietako bat.
Kanpainaren barruan banatuko dituzten eskuorrietako bat. EUSKARABIDEA

Ion Orzaiz -

2018ko urtarrilak 18

Hautatu hezkuntza euskaraz, hautatu D eredua izeneko kanpaina herrialde osora zabaltzeko asmoa du administrazioak Nafarroan. Egitasmoarekin bat egin duten tokiko entitateek «Nafarroako biztanleria gehiena hartzen dutela» nabarmendu dute Euskarabideko arduradunek. Izan ere, kanpainara batu dira Nafarroako udalerri eta mankomunitate handienetako batzuk: Iruñea, Barañain, Eguesibar, Sakana, Zizur Nagusia, Berriozar, Uharte, Burlata, Orkoien eta Agoitz, besteak beste.

Euskarazko ereduan izena emateko arrazoien artean, «Nafarroako euskarazko irakaskuntza zentroek 40 urtetik gorako denboraldian pilaturiko esperientzia pedagogiko zabala» aipatu du Euskarabideko zuzendari Mikel Arregik.

Bestalde, «eleaniztasunaren balioa» azpimarratu du Unai Lakok, tokiko entitateen izenean. «Gero eta pluralagoa eta globalizatuagoa den gizarte honetan, eleaniztasunak aukera ematen du komunitate kohesionatuagoak eraikitzeko, ezagutza eta integrazio kulturala errazten ditu eta aniztasunarekiko errespetua sustatzeko balio du; gainera, aukera gehiago eskaintzen ditu gizartearen eta enpleguaren alorretan».

Nafarroan, 2016-2017 ikasturtean lehen aldiz eskolatutako 6.341 haurren artean, %30ek D ereduan eman zuten izena.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna