Ingurumena

Aire kutsaduraren aurkako neurririk hartu ezean, Bruselak auzitara joko du bederatzi herrialderen aurka

Bederatzi herrialdek oraingoz ez dute neurri nahikorik aurkeztu aire kalitate txarra hobetzeko, eta Europako Batzordeak beste astebeteko epea eman die.

Kutsadura Madril gainean.
Kutsadura Madril gainean. Efe

Berria -

2018ko urtarrilak 30

Bederatzi herrialdetako gobernu ordezkariek eta Europako Batasuneko Ingurumen komisarioak bilera egin dute gaur Bruselan, aire kutsaduraren inguruan hartu nahi dituzten neurriak aurkezteko asmoz. Hain zuzen ere, Bruselak aire kalitate txarrenaz ohartarazitako bederatzi herrialdeak egon dira bileran Karmenu Vella Ingurumen komisarioarekin: Txekiar Errepublika, Alemania, Frantzia, Espainia, Italia, Hungaria, Errumania, Eslovakia eta Erresuma Batua.

Aire kutsaduraren mugak gainditu dituzte herrialde horiek hainbat hiritan, bereziki, NO2 (nitrogeno dioxidoa) eta PM10 partikulen pilaketagatik. Aire kutsaduraren arazoa larritzat jo du berriro ere Vellak, eta hargatik 400.000 europar "behar baino lehenago" hiltzen direla gogoratu du. Aldi berean, gaixotasunek eta lan absentismoak ere arazo ekonomiko handia dakarkie Europako erakundeei. "Gure lehentasuna herritarrak babestea da", ohartarazi du Vellak, herrialdetako ordezkariak aurkeztutako neurriak baloratzerakoan. Izan ere, ez direla inola ere nahiko ohartarazi du Ingurumen komisarioak. "Estatukideek zerbait egiteko erantzukizuna dute", adierazi du.

Hurrengo astearen bukaerara arteko epea eman die komisarioak bederatzi gobernuetako ordezkariei. Bestela, Europako Justizia Auzitegira joko duela berretsi du. Bruselak gogorarazi du 27 herrialdeetatik 23tan antzeman dituztela aire kutsadura kasuak, 130 hiritan hain zuzen ere. Egoerarik larriena gaur bileran izan diren bederatzi herrialde horietan dago, baina arazo orokorra da Europako Batasun osoan. Europak 2009an hasi zen ohartarazten herrialde hauek aire kalitate txarraren arazoarengatik, eta ia urtero egin die ohartarazpen bera. Azken ohartarazpena 2017ko otsailean egin zien Bruselak, eta abisua eman zien, "azken ohartarazpena" izango zela justiziara jo aurretik. Astebete dute oraindik zerbait egiteko.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna