Katalunia

Prozesua "bukatu" duten mezuak

"Suposatzen dut argi duzula hau bukatu dela. Gureek sakrifikatu gaituzte, ni bederen". Halaxe erran dio Puigdemontek ERCko Comini mezu batean, Espainiako kate baten arabera. Cominen abokatuak salatu du "testuingurutik kanpo" eman dutela mezuen berri, eta "pribatutasuna urratu" diotela adierazi du Puigdemontek.  

Atzo, jendea, Puigdemonten mozorrarekin. TONI ALBIR / EFE
mikel rodriguez
2018ko urtarrilaren 31
16:01
Entzun

Kataluniako prozesua "bukatu" eginen dutela, horixe iragarri du Espainiako Telecinco kateak Carles Puigdemont Kataluniako presidentetzarako hautagaiari egotzitako mezuen berri eman behar zuenean. Kate horrek dioenez, Toni Comin Generalitateko Osasun kontseilaria zenaren telefonotik grabatu dituzte mezuak, Bruselan. Iturri horrek azaldu duenez, Carles izenarekin gordetako kontaktu batek idatzi dio Comini. "Katalunia errepublikanoaren azken egunak bizitzen ari gara", mezuarekin hasi du elkarrizketa, eta, bertzeak bertze, erran dio "Moncloaren planak irabazi" egin duela, eta espero duela "guztiak" espetxetik atera ahal izatea, "bertzela lotsagarrikeria historiko bat" gertatuko litzatekeelako. Telecincok argitaratu duenaren arabera, mezuen artean hainbat minutuko tartea dago, eta ez da Cominen erantzunik ageri.

Zalaparta handia sortu du berriak, batez ere Espainiako hedabideetan. Puigdemontek Twitterren mezu bat idatzi du. "Kazetaria naiz, eta beti ulertu dut mugak daudela, pribatutasunarena bezala, eta inoiz ezin dira urratu. Gizakia naiz, eta une batzuetan nik ere zalantza egiten dut. Presidentea naiz baita ere, eta ez naiz uzkurtuko, eta ez dut gibelera eginen, herritarrekiko eta herrialdearekiko errespetuagatik, eskerragatik eta konpromisoagatik. Jarraituko dugu". Cominen abokatu Gonzalo Boyek Catalunya Radiori erran dio ERCko kideak kereila bat aurkeztuko duela Telecincoren aurka.

"Ez dut horren berririk", erantzun du Teresa Jorda ERCk Espainiako Kongresuan duen diputatuak Puigdemont "sakrifikatu" al duten galdetu diotenean. "Oraingoz, Carles Puigdemont da hautagaia. Zer gertatuko den esperoan gaude, saiatzeko inbestidura egiazkoa eta eraginkorra izan dadin, sinbolismoekin ez baitugu herrialde bat irabaziko".

Ines Arrimadas Ciutadanseko buruaren ustez, "denek" dakite independentziarako prozesua bukatu dela, "baina ez dira ausartzen jendaurrean erratera".

 

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.