Kalera aterako dira, bihar, Araba, Bizkai, Gipuzkoa eta Nafarroako pentsionistak. Pentsioak jasaten ari diren murrizketak salatu, eta pentsiodunen erosahalmena bermatuko duen pentsio sistema baten alde, lau hiriburuetako kaleak betetzeko deia egin dute pentsionisten plataformek. Salatu dutenez, pentsioak erosahalmena galtzen ari dira, eta Espainiako Gobernuak iragarritako %0,25eko igoeraren aurka agertu dira. Horri aurre egiteko, plataformetako ordezkariek aldarrikatu dute pentsioak KPIaren maila berean igotzea.
Bilboko eta Donostiako manifestazioak 12:00etan abiatuko dira. Gasteizen eta Iruñean, aldiz, arratsaldean dira ateratzekoak. Manifestazio guztiak hiriburu bakoitzean Espainiako Gobernuak duen delegazioan bukatuko dira. Bertan, Fatima Bañez ministroak bidalitako gutunak sinbolikoki itzultzeko asmoa dute. Plataformetako ordezkariek adierazi dute, “ikuspegi politiko ezberdinen gainetik”, elkartasuna eta batasuna nabarmendu behar direla, eta gogoratu dute “pentsio duinak” defendatzea ez dela soilik nagusien betebeharra.
