Katalunia

Webgune berria jarri du abian Kataluniako Generalitateak

Azken hauteskundeetan "herritarrek emandako mandatu demokratikoa babesteko" atari gisa aurkeztu du Generalitateak.

BERRIA

Berria -

2018ko martxoak 2

Kataluniako Generalitatea. Errepublikako Gobernua. Hitz horiek irakur daitezke webgunearen goialdean; eta aipagarria, baita ere, sinadura: Katalunia-Belgika, bi adarreko gobernua islatzen duena, eraginkorra bata eta sinbolikoa bigarrena.

Testuan, berriz, Generalitateak gogora ekartzen du nola iazko urriaren 1eko erreferendumean parte hartu zuten bi milioitik gora herritarretatik %90ek independentziaren aldeko hautua egin zuten. Nabarmentzen du, baita ere, egun horretan bertan Espainiako Estatuko segurtasun indarrek 1.066 zauritu eragin zituztela.

Jakinak dira gero etorri zirenak ere: urriaren 10ean Carles Puigdemont presidenteak errepublika aldarrikatu bai, baina aldi berean indargabetu egin zuen, elkarrizketak behartzeko asmoz. Alferrik, baina, Madrilen erantzuna 155. artikulua ezartzea izan baitzen, eskumen guztiak bere gain hartuz. Ondoren heldu ziren Oriol Junqueras eta Joaquim Fornen espetxeratzeak, eta Generalitateko buruaren eta lau kontseilarien erbesteratzeak, besteak beste.

Horiek guztiak kontuan hartuta, Generalitateak webgune berri bat sortu du, "herritarrek emandako mandatu demokratikoa babesteko" asmoz. "Balio demokratikoetan sinesten dugu, bakean eta justizian, eta gure lana da horiek bermatzea. Eta sinesten dugu eta lan egingo dugu denoi aukera hobeak eskainiko dizkien Kataluniako errepublika baten alde".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna