Katalunia

"Erantzun politiko bat" eskatu dio Puigdemontek Europari

Presidente kargugabetuak salatu du epaile baten erabakiak bi milioi botok baino "garrantzi handiagoa" duela.

Puigdemonten agerraldia Junts per Catalunyaren kongresuan. /
Puigdemonten agerraldia Junts per Catalunyaren kongresuan. / BERRIA

Berria -

2018ko martxoak 10

Generalitateko presidente berria aukeratzeko inbestidura saioari data jarri eta egun gutxira atzeratu behar izan du parlamentuko presidente Roger Torrentek. Arrazoia, Espainiako Auzitegi Goreneko epaile Pablo Llarenak ez diola baimenik eman hautagai bakarrari, Jordi Sanchezi, espetxetik irteteko. Erabakiak atzera-aurrera gabeko egoeran utzi du beste behin Katalunia.

Junts per Catalunyaren batzarrean bideokonferentzia bidez egindako agerraldian erabakia kritikatu du Carles Puigdemontek: "Bi milioi katalan baino garrantzitsuagoa da epaile bat? Ez dut onartuko. Zenbat iraungo du honek, Europa? Zergatik ez dago erantzun politiko bat?".

Presidente kargugabetuak leporatu dio Llarenari alderdia iraintzea eta jazarriak izateko "mehatxupean" jartzea, "hark edo Espainiako Gobernuko bere lagunek" euren hauteskunde programa gustuko ez dutelako. "Giza eskubideak errespetatuko dituen errepublika bat nahi dugu. Itxaropena, errespetua, bakea eta askatasuna emango diguna eta menpeko eta esaneko gisa tratatuko ez gaituena".

Hian zuzen ere, Espainiako justiziatik ihes Belgikara erbesteratutako kontseilarietako bat, Clara Ponsati, Eskozian da egun. 2017an Generalitatean sartzeko utzitako irakasle lanetara itzuli da, St. Andrewsko Unibertsitatera.

 

100.000 bazkidetik gora

Ohiko batzarra egin du Omniumek Bartzelonan, bertan jakinarazi du dagoeneko gainditu duela 100.000 bazkideko langa, eta babes horrekin Errepublika eraikitzeko lanean jarraituko duela datozen hilabeteetan ere. "155. artikuluaren aurka egiteko balioko digun gehiengoa behar dugu", aldarrikatu du Marcel Mauri presidenteordeak.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna