ETB

Gazteen musika talde bat osatuko dute ETB3ko '3zpa4!' saioan

Egunero emango dute saio berria, 20:30ean. Bestetik, 3txulo berritua itzuliko da datorren astelehenean.

'3zpa4' saioko protagonistak. /
'3zpa4' saioko protagonistak. / Urola Kostako Hitza

Urtzi Urkizu -

2018ko apirilak 3

Ander Elordui, Maitane Lopetegi, Ekain Ibarguren eta Mikele Arizkorreta gazteak tailer zahar batean bilduko dira, eta musika talde bat osatzea da haien helburua. Astero musika emanaldi bat prestatzen ibiliko dira, asteko bideoklipa aurkezteko. Hori da ETB3ko 3zpa4 saio berriaren oinarria. Datorren astelehenean estreinatuko dute programa. Baina, aurretik, 1, 2...3zpa4 saio bereziak emango dituzte bihar, etzi eta etzidamu (20:30). Lau protagonistek lehen topaketa ikusi ahalko da programa horietan. Taldeak batik bat abesti ezagunen bertsioak egingo ditu bideoklipetan.

ETB3 indartzeko asmoz sortu dute gaztetxoeei zuzendutako saio berria. Gainera, 3txulo berrituaren atalak ematen hasiko dira datorren astelehenean (08:15). Atal berriak izango ditu programak: Pika-Pika izenekoan, bideoklipak eskainiko dituzte; Top-era! sailean, zerrendak osatuko dituzte; 3zpa4! saioko gazteek egiten dutenari begira ere jarriko dira Xbel (Zuriñe Hidalgo), 2ttor (Iker Galartza) eta 4ra (Amancay Gaztañaga).

Bi saioak elkarlanean egingo dituzte Pausoka eta Baleuko ekoizpen etxeek. Zuzendaria Itziar Gomez izango da. "ETB3k behar zuen apustua da 3zpa4 saioa", esan du Gomezek —Goenkale, Irrikitown eta Go!azen saioetan aritutakoa da, besteak beste—. Iragarri du  3zpa4 saioko taldearen kontzertu bat antolatu nahiko luketeela uda parterako.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna