Iker Vicente aise nagusitu da Xabier Orbegozo Arria V.aren kontra jokatutako aizkora apustuan. Ikusmin handia sortu du gaurko hitzorduak, eta 1.200 lagunetik gora bertaratu dira Tolosako zezen plazara. Bi aizkolariek 12:00etan ekin diote desafioari.
Guztira, hogei enbor ebaki behar izan dituzte gaurkoan, hamabi kanaerdiko eta 60 ontzako zortzi. Arria V.ak jarri ditu kanaerdikoak, eta Vicentek 60 ontzakoak. Bi aizkolariek beraiek jarritako enborrak moztu dituzte aurrena, eta ondoren hasi dira aurkariak jarritako materiala mozten. Lan erdiak eginda, Otsagabiako aizkolariak minutu bat eta berrogehita bost segundoko aldea kendu dio Arria V.ari. Txapeldunak 56 minutu eta 28 segundo behar izan ditu lan guztiak amaitzeko. Arria V.ak, aldiz, 59 minutu eta 37 segundo. Horrenbestez, Vicentek hiru minutuko eta bederatzi segundoko aldea atera dio errezildarrari. Otsagabiara joango dira jokoan zeuden 12.000 euroak.
Apustua bukatzean, “pozez zoratzen” agertu da Vicente.
Kronika osoa, Urola Kostako Hitzan.
