Hiru agintaldiz jarraian, Hungariako lehen ministro izango da Viktor Orban. Alde handiarekin gailendu zaie aurkari politikoei, eta lau puntu handitu du 2014an jaso zuen babesa, botoen %95 zenbatuta. Horrez gain, litekeena da parlamentuan bi hereneko gehiengoa ere lortzea Orbanek gidatzen duen Fidesz alderdi kontserbadore nazionalistak.
Orbanek ziurtatu du hauteskundeen emaitza "Hungariarentzako garaipen handi bat" dela. "Hasitako bidean jarraitu ahalko dugu, herrialdea defendatzeko". Bestalde, balioa aitortu dio bozkan izan den parte hartzeari. Botoa emateko eskubidea zutenen %70ek parte hartu dute.
Hauteskunde kanpainan, migratzaileen eta errefuxiatuen kontrako diskurtso alarmista jorratu du Orbanek.
Hungariako gobernuburuaren jokabidea hainbatetan kritikatu dute Europako Batasuneko ordezkariek. Besteak beste, aurreko legealdiak bultzatu zuen konstituzio erreformaren harira. Prentsa askatasuna murriztea leporatu zion Bruselak.
